فضل اللہ،طالبان، لال مسجد اور بی ایل اے سے خطرہ ہے

پرویز مشرف کا کہنا ہے کہ وہ یہ بات آرمی چیف پر چھوڑتے ہیں کہ فوج غداری کے مقدمے میں ان کے دفاع میں کس حد تک جاسکتی ہے،

فضل اللہ، تحریک طالبان، لال مسجد عناصر اور بی ایل اے سے خطرہ ہے، طلال بگٹی نے تو میرے سر کی قیمت مقرر کر رکھی ہے۔ برطانوی نشریاتی ادارے کو ایک انٹرویو کے دوران پاک فوج کے سابق سربراہ اور صدر پرویز مشرف سے جب یہ پوچھا گیا کہ آپ کے خیال میں فوج آپ کو بچانے کے لیے کس حد تک جاسکتی ہے تو ان کا کہنا تھا کہ فوج کے اندر رائے ضرور لی جاتی ہے تاہم حتمی فیصلہ فوجی سربراہ کرتا ہے، اب ان پر چھوڑتا ہوں کہ وہ کیا کرتے ہیں۔ پرویز مشرف نے ایک بار پھر دعویٰ کیا کہ ان کے خلاف غداری کے مقدے پر فوج کو تشویش اور ناراضی ہے، اس کے ساتھ گرمی سردی میں سخت حالات میں وقت گزارا ہے، جنگیں بھی لڑی ہیں۔ اپنے فارم ہاوٴس پر ہی غیر رسمی گفتگو کرتے ہوئے پرویز مشرف نے بتایا کہ انہوں نے آرمی چیف کا عہدہ سنبھالنے پر جنرل راحیل شریف کو مبارکباد کا خط لکھا لیکن خود ان سے نہیں ملیں گے تاہم اگر آرمی چیف جنرل راحیل ملنا چاہیں تو مل لیں گے۔ پرویز مشرف نے کہاکہ انہیں لال مسجد عناصر، القاعدہ، تحریک طالبان، بلوچستان لبریشن آرمی سے خطرہ ہے جبکہ طلال بگٹی نے بھی سر کی قیمت مقرر کر رکھی ہے۔

اردو ٹائمز