افغانستان: ہیلی کاپٹر کا حادثہ، چھ امریکی فوجی ہلاک

افغانستان میں تعینات غیر ملکی افواج کے مطابق ملک کے جنوبی حصے میں ہیلی کاپٹر کے حادثے میں چھ امریکی فوجی ہلاک ہوگئے ہیں۔

ایساف کے مطابق یہ حادثہ صوبہ زابل میں پیش آیا اور تاحال اس کی وجوہات جاننے کے لیے تحقیقات جاری ہیں۔
ایساف کی جانب سے جاری کردہ مختصر بیان کے مطابق ابتدائی اطلاعات سے اشارے ملے ہیں کہ جب یہ حادثہ پیش آیا تو علاقے میں ’دشمن کی کسی قسم کی سرگرمیاں نہیں تھیں‘۔
امریکی محکمۂ دفاع نے تصدیق کی ہے کہ ہلاک ہونے والے فوجی امریکی تھے جبکہ ایک امریکی اس حادثے میں زخمی بھی ہوا ہے۔
زابل کے نائب گورنر نے خبر رساں ادارے ایسوسی ایٹڈ پریس کو بتایا کہ نیٹو کا ہیلی کاپٹر دور دراز ضلع شجاعو میں تباہ ہوا۔ تاہم یہ واضح نہیں کہ وہ اسی ہیلی کاپٹر کی بات کر رہے تھے۔
افغانستان میں نیٹو کے ہیلی کاپٹروں کی تباہی کے متعدد واقعات پیش آ چکے ہیں جن میں سے کچھ حادثوں اور کچھ طالبان کے حملوں کا نشانہ بنے۔
2011 میں طالبان نے صوبہ وردک میں ایک شنوک ہیلی کاپٹر گرانے کا دعویٰ کیا تھا جس میں 38 افراد ہلاک ہوئے تھے اور ان میں سے بیشتر امریکی تھے۔
خیال رہے کہ رواں برس کے آغاز میں ایساف نے افغانستان کی سکیورٹی کا انتظام افغان افواج کو سونپ دیا تھا تاہم وہاں اب بھی 97 ہزار غیرملکی فوجی موجود ہیں جن میں سے 68 ہزار کا تعلق امریکہ سے ہے۔
دسمبر 2014 تک افغانستان سے تمام غیرملکی جنگجو فوج چلے جائے گی اور یہاں رہ جانے والے فوج صرف تربیت اور مشاورت کے عمل کا حصہ بنیں گے اور اس کے لیے ابھی افغان حکومت کی منظوری باقی ہے۔

بی بی سی اردو