حزب اللہ کے اسلحہ ڈپو میں متعدد دھماکے،7 ہلاک

بیروت (العربیہ ڈاٹ نیٹ ،ایجنسیاں) لبنان کے مشرقی علاقے وادی البقاع میں شیعہ ملیشیا حزب اللہ کے اسلحہ ڈپو میں متعدد دھماکے ہوئے ہیں جن کے نتیجے میں سات افراد ہلاک اور نو زخمی ہو گئے ہیں۔

لبنانی حکام اور علاقے کے مکینوں کے مطابق وادی بقاع کے دو دیہات نبشیط اور خدر کے درمیان واقع ایک غیر آباد جگہ میں اسلحہ اور گولہ بارود کے ایک ڈپو میں دھماکے ہوئے ہیں۔یہ اسلحہ ایک زیر تعمیر عمارت میں رکھا گیا تھا۔

عینی شاہدین نے خبر رساں ادارے ‘اے ایف پی’ کو بتایا ہے کہ بم دھماکوں کے بعد حزب اللہ کے کارکنان نے علاقے کا گھیراؤ کر لیا اور متعدد ایمبولینس گاڑیاں جائے وقوعہ پر پہنچ گئیں۔ زخمیوں میں چار شامی بھی شامل ہیں۔

لبنان کے سکیورٹی حکام نے بعلبک شہر کے نزدیک واقع علاقے میں ”متعدد دھماکوں” کی تصدیق کی ہے لیکن یہ نہیں بتایا کہ یہ دھماکے کیسے ہوئے ہیں۔واضح رہے کہ حزب اللہ کے پاس ہزاروں راکٹ اور بھاری مقدار میں گولہ وبارود موجود ہے۔

حزب اللہ لبنان کی مخلوط حکومت میں شامل ہے اور وہ شام میں جاری خانہ جنگی میں صدر بشار الاسد کی حمایت کررہی ہے جبکہ لبنانی حزب اختلاف ان کی مخالف ہے اور وہ شامی حزب اختلاف کی حامی ہے۔