کردستان: ممتاز سنی عالم دین کا انتقال

سنندج(سنی آن لائن) ایرانی صوبہ کردستان کے ممتاز عالم دین ’کاک عمر شاپری‘ اتوار دس جون 2012ء میں دل کا دورہ پڑنے سے انتقال کرگئے۔ انا للہ وانا الیہ راجعون۔

مقامی نیوز ویب سائیٹ (اصلاح) کی رپورٹ کے مطابق شیخ عمر شاپری صوبہ کردستان کے صدرمقام سنندج میں طویل علالت کے بعد خالق حقیقی سے جا ملے۔ مرحوم مغربی ایران میں سرگرم ’مکتب قرآن‘ نامی دینی و تعلیمی تنظیم کی مجلس عاملہ اور افتاء وقضا بورڈ کے فعال رکن تھے۔

کاک عمرشاپریؒ ممتاز سنی رہنما کاک احمدمفتی زادہ رحمہ اللہ کے قریبی شاگرد و ساتھی تھے۔ آپؒ مکتب قرآن کی دعوتی و اصلاحی سرگرمیوں کے آغازہی سے مذکورہ ادارے سے وابستہ رہے اور آخری دم تک خدمت دین میں مصروف رہے۔

’سنی آن لائن‘ ٹیم مرحوم کے اہل خانہ، متعلقین اور کردستان کے غیور مسلمانوں سمیت ایران کی پوری سنی برادری سے تعزیت کا اظہار کرتی ہے۔ اللہ تعالی سے دعا ہے مرحوم کو جنت الفردوس میں اعلی مقام عطا فرمائے اور پس ماندگان کو صبرجمیل نصیب فرمائے، آمین۔