پینٹاگون پر حملے کی سازش، امریکی گرفتار

واشنگٹن(خبرايجنسياں) پینٹاگون اور پارلیمنٹ پر فضائی حملے کے الزام میں ایک امریکی شہری رضوان فردوس کو گرفتار کر لیا گیا ہے۔
امریکی اٹارنی کارمین اوٹزنے ایک بیان میں چھبیس سالہ رضوان فردوس کی گرفتاری کی تصدیق کی۔ میساچوسٹس سے تعلق رکھنے والا رضوان فردوس فزکس میں گریجویٹ ہے جس پر اسلحہ رکھنے اور سیل فون آلات کے ذریعے دھماکے کرنے کے الزامات لگائے گئے ہیں۔
امریکی حکام کے مطابق رضوان فردوس نے ایف بی آئی ایجنٹوں کو بھی وہ آلات فراہم کیے جن سے دھماکے کیے جاسکتے ہیں۔
امریکی اٹارنی نے دعویٰ کیا ہے کہ رضوان فردوس پینٹاگون اور پارلیمنٹ پر ریموٹ کنٹرول جہاز سے حملہ کرنے کی منصوبہ بندی کر رہا تھا۔