کراچی(جنگ نیوز) کراچی کے علاقے ڈیفنس اور بلدیہ ٹاؤن میں پاکستان نیوی کی بسوں پر بموں سے حملوں کے نتیجے میں خاتون ڈاکٹر سمیت4 افراد جاں بحق جبکہ 56 زخمی ہوگئے۔
صبح سات بجکربیس منٹ پر آفس کیلئے نکلنے والے نیوی کے اہلکاروں کی بس کو ڈیفنس فیز2اور بلدیہ ٹاؤن میں نشانہ بنایا گیا۔ ڈیفنس میں ہونیوالے دھماکے میں نیوی کی لیڈی ڈاکٹر سمیت2 افراد جاں بحق جبکہ37 افراد زخمی ہوئے۔دھماکے سے عمارتوں کے شیشے بھی ٹوٹ گئے ۔
بلدیہ ٹاؤن میں ہونیوالے دھماکے میں2 ہلاکتیں ہوئیں جبکہ19سے زائد افراد زخمی ہوئے۔ وزیر اعلیٰ سندھ سید قائم علی شاہ نے بھی جائے وقوعہ کا دورہ کیا۔انہوں نے کہا کہ انکے پاس اس طرح کی دہشت گردی کی کارروائی ہونے کی اطلاع تھی۔
دھماکوں کے زخمیوں اور لاشوں کو ڈیفنس میں واقع پی این ایس شفا اسپتال منتقل کیا گیا ہے۔ دھماکا کے بعد قانون نافذ کرنیوالے اداروں کے حکام موقع پر پہنچ گئے۔ نیوی کے اہلکاروں نے علاقے کو گھیرے میں لے لیا۔
بلدیہ ٹاؤن میں جائے وقوعہ کے قریب سے ایک دس کلو وزنی بم برآمد ہوا جسے ناکارہ بنا دیا گیا۔ وزیر داخلہ رحمن ملک نے دھماکوں کی مذمت کرتے ہوئے آئی جی سندھ فیاض لغاری سے تحقیقاتی رپورٹ طلب کر لی ہے۔