دمشق(ايجنسياں) شام کی سیکیورٹی فورسسز نے سوموار کو علی الصباح درعا شہر پر چار اطراف سے حملہ کیا، جس کے بعد علاقے سے زوردار دھماکوں اور شدید فائرنگ کی آوازیں سنائی دیں۔ سیکیورٹی فورسسز کی کارروائی کے بعد شہر کا لینڈ لائن کے ذریعے مواصلاتی رابطہ منقطع ہو گیا۔
خبر رساں ادارے “رائیٹرز” کے مطابق سیکیورٹی فورسسز نے دارلحکومت دمشق کے قریب بلدیہ دوما پر بھی ہلہ بولا ہے۔ ابتدائی اطلاعات کے مطابق درعا البلد اور درعا المحیطہ سے پانچ افراد کے ہلاک ہونے کی اطلاعات موصول ہوئی ہیں۔
شام میں سرگرمیاں انسانی حقوق کے ذرائع نے ساحلی شہر جبلۃ میں ہونے والے جھڑپوں میں ہلاک ہونے والوں کی تعداد 13 بتائی ہے۔ یہ افراد سیکیورٹی فورسسز کی فائرنگ سے ہلاک ہوئے۔ درعا کے نزدیکی شہر نوی میں بھی جمعہ کے روز ہلاک ہونے والوں کی آخری رسومات کے موقع پر بھی سیکیورٹی فورسسز اور جنازے کے شرکاء کے درمیان تصادم کی اطلاعات موصول ہوئی ہیں۔
خبر رساں اداروں کی جانب سے دمشق کے مرکز میں واقع الزبلطانی کالونی میں احتجاجی مظاہرین پر سیکیورٹی اہلکاروں کی فائرنگ کی تصویریں جاری کی جا رہی ہیں۔
عینی شاہدین اور انسانی حقوق کے اداروں کا کہنا ہے کہ اس سے پہلے شام کے شمال مغربی شہر اللاذقیہ کے قریب واقع جبلۃ ٹاون میں سیکیورٹی فورسزز کی فائرنگ سے چار افراد ہلاک ہوئے۔
ایک عینی شاہد نے فرانسیسی خبر رساں ادارے “اے ایف پی” سے بات کرتے ہوئے کہا کہ سیکیورٹی اداروں کے مشاق نشانہ بازوں نے جبلۃ کی سڑکوں پر اس وقت اندھا دھند فائرنگ کی جب اللاذقیہ کے نئے گورنر عبدالقادر محمد الشیخ نے شہر کا دورہ کیا تاکہ اس شہر کے باسیوں کے مطالبات کے بارے میں جان سکیں۔ اس فائرنگ سے ایک شخص ہلاک جبکہ بیسوں دوسرے زخمی ہو گئے۔ عینی شاہد نے صورتحال کو انتہائی خراب قرار دیا ہے۔