تالش (سنی آن لائن): ایران کے شمالی صوبہ گیلان کے شہر تالش سے تعلق رکھنے والے ممتاز سنی عالم دین شیخ قریشی گزشتہ ایک ہفتہ سے لاپتہ ہیں۔
سنی ذرائع ابلاغ کے مطابق تالش کے دینی مدرسے کے مہتمم اور جامع مسجد محمدیہ کے خطیب کے گھر پر گزشتہ ہفتے کے اتوار 10 جنوری کو پولیس اور حساس اداروں نے چھاپہ مار کر انہیں گرفتار کیا جس کے بعد انہیں نامعلوم پر منتقل کردیا گیا۔ سیکورٹی اہلکاروں نے سنی عالم دین کی ذاتی اشیاء کمپیوٹر، کتابیں اور موبائل سمز تک اپنے ساتھ لے گئے۔
ذرائع کا کہنا ہے شیخ قریشی ایران کی سیکورٹی ایجنسی کی کوٹھڑیوں میں زیر حراست ہیں۔
یاد رہے کئی برس پہلے بھی شیخ قریشی ایک سال تک قید رہے ہیں۔ اب کی بار ان کی اغوانما گرفتاری کی کوئی وجہ سامنے نہیں آئی ہے۔ ذرائع کے مطابق شیخ قریشی ایک صالح اور خیرخواہ داعی عالم دین ہیں جن کا کسی سیاسی دھڑے سے کوئی تعلق نہیں ہے۔ اس کے با وجود ان کی غیر قانونی گرفتاری اور گھروالوں سے رابطہ کرنے کی اجازت نہ دینا باعث تشویش ہے۔