راجی سۆباں ءُ ایران ءِ مردمانی زندمان نه بائد گۆں دگه ملک ءُ استمانے ءِ سۆباں گرهن دیگ بیت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (5 تیرماه 1405/ 26 جون 2026) گۆں اشاره به مردمانی تهرتهرێں سکیاں هاسکار ماں مالزانشت ءُ رۆزیگی پڑاں، ٹکاٹک گوشت که ماں پهکێں ترانکاریاں بائد راجی سۆباں ءُ ایران ءِ مردمانی زندمان ءِ گهبودی دێمتر ءُ شه هر ملک ءُ استمانے ءِ سۆباں پێشتر بیت.

🔹«ایران ءِ استمان ءِ سۆباں» بائد تران‌کارێں پاٹی ءِ مسترێں اولویت بیت

په سنی‌آنلاین ءِ سرهال ءَ مولانا عبدالحمید گۆں وشالی شه ایران ءُ امریکا ءِ ترانکاری مراگشانی برجم دارگ ءَ درشان کرت: ما سهل ءُ ترانکاری ءِ دۆزواه اێں. قرآن مجید ءَ هم ماں اے پاگپ ءَ «وَإِنْ جَنَحُوا لِلسَّلْمِ فَاجْنَحْ لَهَا وَتَوَكَّلْ عَلَى اللَّهِ» همے بن‌گپ ءِ سر ءَ کڈن کرتگ. پمێشا من اے ترانکاری ءُ سهل ءَ په ایران ءُ آدگه استمانانی سۆب ءَ زان آں.

واجه ءَ وتی هبرانی دێمتر ءَ درائێنت: ماں ایران ءُ امریکا ءِ ترانکاریاں مسترێں اگده همێش انت که دوئێں استمانانی سۆباں دلگۆش به انت. ایران ءِ استمان ءِ سۆباں دێمتر انت ءُ په مئے ملک ءِ تران‌کارێں پاٹی ءَ بائد ایران ءِ استمان ءِ سۆب شه هر دگه استمان ءُ ملکے ءِ سۆباں دێمتر به انت.

🔹نه بائد ایران ءُ امریکا ءِ راجی سۆباں گۆں اسرائیل ءُ لبنان ءَ گرهن دیگ به انت

زاهدان ءِ آدێنگ ءِ امام ءَ ٹکاٹک گوشت: اے امریکائیانی سۆب ءَ نه انت که اسرائیل آوانی سُهرێں کشک بیت، همےرنگ په مئے کارمستراں هم بائد شه هر چیز ءَ دێمتر ایران ءِ مردمانی سۆب به انت. من اێشر ءَ راست نه زان آں که ایران ءُ امریکا ءِ راجی سۆباں گۆں اسرائیل ءُ لبنان ءَ گرهن دیگ به انت.

واجه ءَ گێش کرت: اے رۆچاں ایران ءِ مردماں سکێں رۆزیگی جاورے ءِ آماچ انت؛ پمێشا نه بائد آوانی زندماں گۆں دگه ملکے گرهن دیگ بیت. جوان انت که شه مظلوم ءِ حق ءُ اۆبال ءَ دێمپانی بیت، بلے ملک ءِ سرنبشت ءُ سۆبانی گرهن دیگ گۆں دگه ملکے وشێں کردے نه انت.

🔹ایران ءُ امریکا پد شه وتی جێڑهانی گیشءُگیوار ءَ توان انت اسرائیل ءُ لبنان ءُ فلسطین ءِ جێڑه ءَ گۆں دیپلماسی ءَ رندگیری کن انت/ په میان‌رۆدرآت ءِ مشکلانی گیشءُگیوار ءَ تیوگێں ملکانی هواری زلورت انت

زاهدان ءِ آدێنگ ءِ امام ءَ گوشت: ایران ءُ آمریکا ءَ پد شه اێشی که وتی جێڑهاں گیشءُگیوار کن انت ءُ گۆں وت دیپلماتیکێں رهوت داشته به انت، گڑا توان انت اسرائیل، لبنان ءُ فلسطین ءِ جێڑهاں هم گۆں دیپلماسی ءَ رندگیری ءُ جۆڑ کن انت.

واجه ءَ گێش کرت: تاں وهدےکه میان‌رۆدرات ءِ جێڑهاں گیشءُگیوار مه بنت، آدگه مشکلاں هم جۆڑ نه بنت. په میان‌رۆدرآت ءِ مشکلانی گیشءُگیوار ءَ تیوگێں ملکانی هواری زلورت انت. تیوگێں ملکاں ماں میان‌رۆدرآت ءَ سیت دار انت. تاں کدێن بائد اے جێڑهاں به انت ءُ میان‌رۆدرآت جنگ ءِ آچش ءِ ته ءَ سُچ ایت؟!

🔹حکومت کنگ ءُ راجی سۆبانی پهازگ گوں مارشتاں ءُ اۆگام ءَ نه بیت

مولانا عبدالحمید وتی هبرانی دێمتر ءَ په «پهزێز شه مارشتاں ءُ اۆگام» ءَ کڈن کرت ءُ گوشت ئی: واجه رسول‌الله صلی‌الله‌علیه‌وسلم ءَ هچبر مشرک ءُ یهودی ءُ مسیحیانی باروا که گۆں مسلماناں دشمنی اشَ کرت، «مرک» ءِ اۆگام نه جت. پمێشا هچ استمان ءُ ملکے ءِ باروا مرک ءِ اۆگام مه جن اێں. هرچۆں که لهتے گوش انت آوانی مراد استمان نه انت، بلے وهدے یک ملکے ءِ مرک ءِ اۆگام جنگ بیت گڑا آئی استمان هم هوار بیت.

واجه ءَ گێش کرت: جوان نه انت که چلءُهپت سال پێش ءِ اۆگاماں برجاه دار اێں، پچےکه جاور بدل بوتگ ءُ آوان که انقلاب ءِ اول ءَ بوتگ انت، نون نه انت. بائد انت جاور ءَ سرپد به اێں. حکومت کنگ ءُ حکومت ءُ راجی سۆبانی پهازگ گۆں اۆگام ءَ نه بیت. بائد انت ملک ءِ ته ءَ نۆکێں دۆرے بنگێج بیت ءُ ترانکاری بیت، همارنگ که گۆں ڈنیاں گپءُتران کن ات گۆں استمان ءَ هم گپ کن ات ءُ استمان ءِ لۆٹاں گۆش دار ات.

🔹سیاسی بندیگاں آزات به ات ءُ گۆں راج ءُ مذاهب ءُ سیاستزانتاں گپءُتران کن ات

مولانا عبدالحمید کڈن کرت: ملک ءِ نونێں جاور ءِ ته ءَ سیاسی بندیگاں آزات کن ات ءُ گۆں آوان گپءُتران بیت. بائد شهری راجمان پرزۆر بیت ءُ شه آوان که شه کانودی راهاں وتی حقاں رندگیری کن انت پله‌مرزی بیت. هچ کس ترۆندی ءَ نه من ایت ءُ ما هم آیرا نه منّ اێں، بلے مچێں دنیا شهری جهداں منّ انت.

واجه ءَ گێش کرت: بائد گۆں راج، مذاهب ءُ سیاسی جهدکاراں گپ‌ءُتران بیت. اے ملک ءِ سۆب ءَ انت ءُ ملک ءِ جاگه ءَ ماں دنیا ءَ گێش کنت ءُ گرانیانی دێم ءَ گیت که الله ءُ مردمانی وشنودی همێشی ته ءَ انت.

🔹پاکستان ءِ کارمستراں ڈاکٹر ماه‌رنگ ءُ آدگه شهری جهدکارانی اُمرکێد ءِ سزا ءَ پرۆش انت

زاهدان ءِ آدێنگ ءِ امام ءَ ماں دگه بهرے شه وتی هبراں گوشت: گوستگێں رۆچاں ڈاکٹر ماه‌رنگ بلوچ که یک سیاسی ءُ انسانی حقانی گلے ءِ رهشۆن انت، ءُ لهتے دگه شه پاکستان ءِ شهری جهدکاراں امرکید ءِ سزا دیگ بوتگ انت.

واجه ءَ گێش کرت: بانۆک ماه‌رنگ بلوچ ءَ په بلوچ راج ءِ حقانی پیلو کنگ ءُ گۆں پرامنی ءَ وتی کاراں دیم ءَ برتگ ءُ په دوری شه ترۆندی ءَ کڈن ئی کرتگ. من پێسر ءَ هم پاکستان ءِ کارمستراں گوشتگ که هما گل ءُ مردماں که شه کانودی راهاں وتی حقاں رندگیری کن انت، په آ ملک ءَ ءُ هاسکار بلوچستان ءَ وار انت، بائد انت آوان کمک به انت، چیاکه اے په پاکستان ءِ امنیت ءَ باز جوان انت.

واجه ءَ درائێنت: پاکستان ایران ءِ همسایک انت ءُ دوئێں ملکاں هوارێں سۆب دار انت. پمێشا ما پاکستان ءِ کارمستران سۆگه کن اێں که بانۆک ماه‌رنگ ءُ آدگه سیاسی جهدکارانی امرکید ءِ سزا ءَ پرۆش ایت ءُ آوان آزات کنت. پاکستان ءِ سرکار گۆں ترانکاری گۆں اے سیاسی جهدکاراں توانت سلاهبندێں گلانَ هم متأثر کنت.

واجه صاحب ءَ همےرنگ شه بلوچستان ءِ مردماں لۆٹ ات که راهاں مه بند انت ءُ گاڑی/ ماشینان بُن مه دےانت، پچے که اے کار ءِ تاوان رۆدرآتکی ءُ رۆاێرشتی بلوچستان ءِ مردماں رس ایت.

🔹 واجه ءَ وتی هبرانی گڈسر ءَ گوشت که دینی وانگجاهاں ماں گرماگ ءِ چُٹیاں/ تعطیلات ءَ په نۆدربر ءُ زانت‌لۆٹاں لیکه ءُ مارشت دار انت، ما شه کهولاں لۆٹ اێں که نودربر ءُ زانت‌‌لۆٹاں په بهز زورگ ماں اے کلاس ءُ برنامهاں دلبڈی دےانت.