پاکستان ءِ ریاست رۆدراتکی بلوچستان ءِ زهرشانی کنۆکانی گپاں گۆش دار ایت ءُ آوانی حقێں لۆٹاں رندگیری کنت

شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (8 فروردین 1404/ 28 مارچ 2025) گۆں اشاره به ترۆندێں زهرشانیاں ماں رۆدراتکی بلوچستان ءَ پاکستان ءِ ریاست ءَ په «زهرشانی کنۆکانی گپانی گۆش دارگ» ءُ «آوانی حقێں لۆٹانی رندگیری» ءَ سۆگه کرت.

🔹پاکستان ءِ ریاست ءِ رکگ ءُ سۆب ماں «ترانکاری» ءُ «مردمانی زهرشانیانی دلگۆش کنگ ءَ» انت

په سنی‌آنلاین ءِ سرهال ءَ شیخ‌الاسلام مولانا عبدالحمید ءَ درشان کرت: اے رۆچاں ماں پاکستان ءَ سک زهرشانی بوگ ءَ انت. مئے خێرێں سۆگه په پاکستان ءِ ریاست ءُ آدگه پاٹیاں همێش انت که گۆں وت گپءُتران کن انت.  ما پهکێن سرکاراں په گپءُتران گۆں استماناں ءُ مردمانی گپانی گۆش دارگ سۆگهَ کن اێں.

واجه ءَ گێش کرت: پاکستان ءِ ریاست ءِ رکگ ءُ سۆب همێش انت که رۆدراتکی بلوچستان ءِ مردمانی گپ ءُ بلوچ راج که اۆد ءِ نندۆک انت ءُ اێراد دار انت، گپان اش گۆش دار ایت. پاکستان ءِ ریاست گۆں رۆدراتکی بلوچستان ءِ زهرشانی کنۆکانی سرۆکاں نند ایت ءُ آوانی گپاں گۆش دار ایت ءُ آوانی حقێں لۆٹاں رندگیری کنت. هر حکومتے چه اسلامی بیت یا غیراسلامی بائد حقێں هبر ءَ منّ ایت. ما مدام وتی ملک ءِ کارمستراں همے سۆگه ءَ کرتگ که مردمانی حقێں لۆٹاں منّ انت ءُ اگاں آوانی لۆٹاں ناحق انت گڑا آوانَ سرپد کن انت.

🔹پاکستان ءِ ریاست ڈاکٹر ماهرنگ بلوچ ءَ آزات کنت/ من گۆں جنێنانی دزگیر کنگ ءُ پاهو ءَ هرجا که بیت سک چپ آں

زاهدان ءِ آدێنگ ءِ امام «بلوچ یکجھتی کمیٹی ءِ سرۆک» ڈاکٹر ماهرنگ بلوچ ءِ آزاتی ءِ لۆٹۆک بوت ءُ گوشت ئی: ڈاکٹر ماهرنگ ءِ وڑێں مردم که انسانی حقانی جهدکار انت، په پاکستان ءِ چاگرد ءَ داد انت.

پاکستان ءِ کارمستراں آیی دزگیری ءِ بدل ءَ گۆں آیی نند انت ءُ آیی گپاں گۆش دار انت، اگاں جائے رد ات آیرا سرپد کن انت، بلێں آیی حقێں ءُ کانودی لۆٹاں منّ انت.

واجه ءَ گێش کرت: من گۆں جنێنانی دزگیری ءَ هرجا که بیت، چپ آں. بائد انت جنێنانی سر ءَ رحم بیت. ما گۆں جنێنانی پاهو ءَ سک چپ اێں ءُ اے باروا ما را شرعی ءُ فقهی منانک هست انت. ماں فقهی روایتاں هست که اگاں یک جنێنے گۆں یک رمبے شه محارباں دزگیر بیت، نه بائد آ جنێن پاهو دیگ بیت.

مئے سۆگه همێش انت که جنێنێں سیاسی بندیگاں ماں ایران، پاکستاں یا هر دگه ملکے که بیت، آزات به انت ءُ آوانی حقێں لۆٹاں رندگیری به انت.

🔹پرایمنێں زهرشانی ءُ مچیانی حرمت ءَ سات ات

مولانا عبدالحمید گوشت: مئے سۆگه په پاکستان ءِ کارمستراں ءُ همے رنگ مئے جند ءِ ملک ءِ کارمستراں همێش انت که میان استمانی کانوداں ءُ ملک ءِ کانوداں وتی استمانانی باروا اێر دار انت. همےرنگ پرایمنێں زهرشانی ءُ مچیانی حرمت ءَ سات انت، پچےکه اے چیز ملک ءُ سرکارانی سۆب ءَ انت که مردمانی گپاں گۆش دار انت.

🔹اسرائیل ءِ بێڑ غزه ءِ مردمانی سر ءَ «سک دل په درد کنۆک» ءُ «غیر انسانی» انت

مولانا عبدالحمید گۆں شرگداری شه اسرائیل ءِ بێڑاں گوشت: شه فلسطین ءُ غزه ءِ نونێن جاور ءَ نه تهنا مسلمانان، بلکه تیوگێں آزادسسائێں مردمانی دل په درد انت. بےرحمی ءُ یک شلێں بمگواریاں که غزه ءِ مردمانی سر ءَ بوگ ءَ انت سک دل په درد کنۆک ءُ اے کرداراں شه انسانیت ءَ دور انت.

واجه ءَ گێش کرت: صحابه ئاں په بیت‌المقدس ءِ گرگ ءَ تاں دێرێں وهدے آ شهر ءَ بِیڑو کرت، بلێں پرا شهر ءِ حرمت ءُ هم اێشی که هونے رێچگ مه بیت، آیی سر ءَ بێڑ اش نه کرت. تانکه یهودیانی مزنێں زانتکار ءَ گوشت کلیت ءَ بس مهتر عمر رضی‌الله‌عنه ءَ دنت ءُ مهتر عمر هم په دێمداری شه جنگ ءُ هۆنرێچی ءَ دورێں راهے شه مدینه ءَ په شام شت تاں شهر ءِ کلیت ءَ زور ایت. ماں اسلام ءِ اول ءَ هۆنرێچی نه بوتگ ءُ مسلمانان ماں جنگاں مۆکل نه داتگ که جنێن ءُ گونڈل ءُ پیرێناں کشگ به انت یا عبادتجاهاں ڈالێنگ به انت.

مولانا عبدالحمید کڈِن کرت: اسلامی ملکاں اگاں گۆں وت تپاک به انت ءُ شه سیاسی راهاں دێم ءَ برو انت، گڑا توان انت په جوانی اسرائیل ءُ فلسطینیانی میانجین ءَ عادلانه ئێں گیشءُگیوارے کن انت.

🔹پست ءُ چاگردی ءُ سیاسی جاگه ءِ ارزشت ماں «راج ءِ هزمت» ءُ «آمید ءِ اێر دارگ» ءَ انت

مولانا عبدالحمید ماں دگه بهرے شه وتی هبراں «عدالت» ءُ «راج ءِ هزمت» ءَ په چاگرد ءِ مچێن پاٹیاں ءُ هاسکار په حاکماں سک هژدری زانت ءُ گوشت ئی: حکومت ءُ حاکم بوتن وهدے ارزشت دار ایت که شه اے جاگه ءَ په راج ءِ هزمت ءُ آمید ءِ اێر دارگ ءَ کارمرز بیت.

واجه ءَ گێش کرت: وشبهت هما انت که وهدے حکومت یا جاگهے رس انت عدالت ءُ آمید ءَ اێرَ دار انت ءُ شه آ جاگه ءَ په وتی زندگی ءِ جۆڑ کنگ ءَ کار نه گر انت، بلکه په مردمانی سۆب ءَ کار کن انت.

زاهدان ءِ آدێنگ ءِ امام ءَ کڈِن کرت: پاگواجه ءُ اسپےریشاں هم بائد مردمی به انت ءُ نه بائد په وتی ءُ وتی زهگانی سۆب ءَ پکر کن انت. گواچنی پاگواجه، کماش، کارمستر ءُ حاکم کسے انت که په مردمانی سۆب ءَ پکر کنت، ابید شه اێشی بائد الله ءِ دێم ءَ پسو دنت که چنکه اے جاگه ءَ را په مردمانی هزمت ءُ عدالت ءِ اێر دارگ ءَ کارمرز ئی کرتگ.