دالبندین مچی، کاروانانی سر بیگ بندات

دالبندین ءَ بلوچ یکجھتی کمیٹی ءِ برجم بیوکیں مچی پنّام بلوچ چُکچینی ءِ روچ درگت ءَ چه چن ءُ لانچ گُڈی بھر ءَ پُترتگ.

بلوچ یکجھتی کمیٹی ءِ بُنجاھی راھشون بیگواھیں مردمانی کھولاں ھوار بلوچستان ءِ دیر دراجیں دمگاں چه مردمانی آیگ ءِ دْرچ برجاه ءَ اِنت، دمگ ءَ موباھل انٹرنیٹ بندی ءَ چه مردمان تُرندیں دلسیاھی ءِ دیمپان کنگ کپگ ءَ اِنت.

مُچی ءِ چن ءُ لانچ ءِ درگت ءَ چه بلوچ یکجھتی کمیٹی بُنجاھی راھشون کامریڈ گلزادی بلوچ ءَ رسانکدر ءَ تران کنان ءَ گْوشتگ که بیست پنچ جنوری ءِ مُچی ءِ سرجمیں چن ءُ لانچ گُڈی بھر ءَ اِنت اے درگت ءَ تھنا بلوچستان اناں بلکیں اوگانستان ءُ ایران ءِ جھمنندیں بلوچ ھم جُھد کنگ ءَ اَنت که آ اے مُچی ءَ وت ءَ بھر به کن اَنت ءُ آ درست ڈاکٹر ماه‌رنگ بلوچ ءَ اش کنگ ءِ واستا بے واب اَنت پرچاکه ڈاکٹر ماه‌رنگ بلوچ اے وھد ءَ انسانی ھکانی درگت ءَ چه آ یک توانمندیں توارے جوڑ بیتگ ءُ بیگواھیں مردمانی کھولانی واستا یک اُمیتے.

آئی ءَ گْوشتگ که اوگانستان ءُ ایران ءَ جھمنندیں بلوچ اے مُچی ءَ بھر بیگ ھاتر ءَ جُھد کنگ ءَ اَنت بلے ریاست ءَ جتاجتائیں ھندانی سر ءَ اڑان ودی کتگ مُچی ءَ بھر زیروکانی راه ءَ دارگ اَنت.

آئی ءَ گْوشتگ که ھمے وڑ گوادر راجی مُچی ءِ وھد ءَ ریاست ءَ که رویشگ پیش داشتگ بلوچ زالبولانی سر ءَ لَٹءُکُٹ کتگ اَنت آ درستانی دیم ءَ اَنت بلے ھما پسّه بلوچستان ءِ مردمانی نیمگ ءَ، چه بلوچ یکجھتی کمیٹی نیمگ ءَ اتکگ آ ھم ریاست ءَ دیستگ مروچی یکرندے پد ءَ ھما رویشگ ءَ پیشدارگ ءَ اِنت بلے ما آئی ءَ گوشگ لوٹ ایں که بلوچ ءَ ھچبر سرجھل نه کتگ، بلوچ ھچبر دم نه برتگ، اگاں یکرندے پد ءَ ریاست ءَ دالبندین مُچی ءِ بےسوب کنگ ءِ جُھد کتگ گُڑا آئی ءِ پسّه سک تُرسناک بیت. کراچی ءَ مئے مات ءُ گھارانی کوشان دور دیگ بیتگ اَنت، آیانی پاکیں چادرانی سر ءَ دست ایر کتگ، آیانی سر ءَ زوراکی کتگ، بلوچ راجی مچی دالبندین ءَ بیوکیں مُچی ءَ بلوچستان ءِ جتاجتائیں دمگاں چه بیگواھیں مردمانی کھولاں ھوار مردمانی مزنیں کساسے ءَ اد ءَ ساڑی اَنت ءُ دالبندین ءِ شرپمندیں راج ھمے وڑ ما را ازت ءُ شرپ داتگ، اے وت ریاست ءِ درشاناں رد کنگ واستا بس اَنت بلوچ راج ءَ را نون په لَٹءُکُٹ ءَ ھلاس کت نه کن ئے بلوچستان ءُ بلوچ راج نون تئی دست ءَ چه درتکگ، بلوچ راج ءِ ورنایانی شعور ءَ را تو لَٹءُکُٹ ٹپءُٹوریں لاشاں ءُ آزارجاھاں چه ھلاس کُت نه کن ئے، اے تئی ردی اِنت که اے وڑیں گامگیجاں چه تو بلوچاں نزور به کن ئے، تو اے ردی ءَ ھچبر مبو پرچاکه مروچی مُچی ءَ یکروچے ساری بلوچستان ءِ دیر دْراجیں دمگاں چه ھزارانی مردم مُچ بیگ ءُ آ کھول ھم ساڑی اَنت که آیانی مردم ریاست ءَ لَٹءُکُٹ کتگ ءُ شھید کتگ اَنت.

آئی ءَ گْوشتگ که اسلامی جمهوریه پاکستان ءَ اے کلوه دیگ لوٹ ایں که اگاں تو بلوچ چُکچینی چه دست نداشت، زوراکی بند نه کت، ھوش ناکن نه زرت، کُشتءُکوش ءَ چه پُشت کنز نه بوت ئے، گُڑا بلوچ ءِ پسّه کئیت، گُرا بژنی ءَ اَبید ھچ دز نه کپ اِیت. نون پُرایمنیں مردماں پُرایمنیں زھرشانی کن اَنت ھچ کس جنگ نه لوٹ اِیت اگاں ما کسے جنگ کن ایں گُڑا آ ھم ایمنی ھاتر ءَ پرچاکه ما باز لاش چست کتگ باز ھونریچی دیستگ مُچی کبر دیستگ نون بس به کن اِت ما گیش لاش چست نه کن ایں، مئے پُرایمن زھرشانی ءَ ایرموش کنگ جُھد مه کن اِت، اگاں ناں اشی ءِ پسّه تُرند بیت.
بنشۆن: دی بلوچستان پست