کتاب میڑہ ءِ سر ءَ پولیس ءِ بیڑ، بازیں نودربرے گوں کتاباں تھانه ءَ برگ بیتگ انت

بلوچستان ءِ تیابدپی شھر گوادر ءَ سَےشمبے ءِ روچ ءَ پولیس ءَ بلوچستان کتاب کاروان ءِ نام ءَ برجمیں یک بک اسٹالے ءِ سر ءَ بیڑ برتگ ءُ نودربر گوں کتاباں پولیس تھانه ءَ برگ بیتگ اَنت.

بلوچ اسٹوڈنس ایکشن کمیٹی ءَ وئیل ءِ پژدر ءَ گوشتگ که اگاں کتابانی وانگ گیر کانونی انت گڑا ڈیھ ءَ دراھیں یونیورسٹی ءُ کالج کبل جنگ ءُ بند کنگ به بنت ءُ پارلیمنٹ ءَ بِل منگ به بیت مروچیگ ءَ پد اے ڈیھ ءَ کتابانی سر ءَ بندش اِنت درستیں جیڑہ ھلاس.

آئی ءَ گوشتگ بلوچستان ءَ دیمروئی ءَ نام دیوکیں گوادر شھر ءَ کتابانی سر ءَ بندش ءُ وانگ ءِ سر ءَ بندش اِنت سک ءَ بژنیگے یے.

ھمے شھر ءَ منشیات ءُ دگه چاگردی سلکاری لس بوگ ءَ انت بلے چاگرد ءَ وانگ ءُ زانت ءِ چراگ ءَ روک کنوکیں ورنا بندیگ جاھاں بند کنگ بنت اِنت اے ڈیھ ءُ وتگڑیں ھاکمانی دیم ءَ شھماتے.

بساک ءَ گوشتگ گوادر ءَ ھوار بلوچستان ءِ دگه جاھاں ھمے ڈول ءَ نودربراں ترسینگ ءِ آماچی انت. اے امل بلوچ ورنایاں وانگ ءَ دور کنگ ءِ پندلے بلے ما چوشیں پندلاں بے سوب کنگ ءَ جد ءُ جھد ءَ یک گامے پشت ءَ نہ کنز ایں ءُ زمه واراں ترندی ءَ گوں گوش ایں که دراھیں نودربراں یل به کن ات ءُ بلوچ ورنایانی ترسینگ بند کنگ به بیت اِنت.

بنشون: دی بلوچستان پست