میان‌رۆدرهت ءِ امنیت گۆں فلسطین ءِ آزاتی ءُ ملگرێں اسرائیل ءِ در بیگ ءَ شه آ ڈگاران همگرنچ انت

سنی‌آنلاین|شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (24 تیر 1401) گۆں اشاره به امریکا ءِ راجکماش ءِ سفر ءَ به تل‌آویو ءُ عربستان ءَ، آیی سفر ءِ مولءُمراد ءَ را اسرائیل ءِ امنیت زانت ءُ گوشت ئِے: میان‌رۆدرهت ءُ دنیا ءِ امنیت تهنا گۆں فلسطین ءِ آزاتی ءُ ملگرێں اسرائیل ءِ در بیگ شه آ ڈگاراں همگرنچ انت.

په سنی‌آنلاین ءِ سرهال ءَ مولانا عبدالحمید درشان کرت: گوستگێں هپتگ ءَ جو بایدن، امریکا ءِ راجکماش ءَ به تل‌آویو ءُ عربستان ءَ سفر کرت. یکے شه بایدن ءِ سفر ءِ مهمێں مولءُمراداں اسرائیل ءِ امنیت انت. آ جهدَ کنت  تاں عربی ئێں ملکان گۆں اسرائیل ءَ تپاک بےانت ءُ آ ملکانی رهوت ءَ گۆں اسرائیل ءَ جۆڑ کنت.

زاهدان ءِ جمعه ءِ امام ءَ گوشت: یکے شه امریکا ءِ سرکار ءُ یوروپی ءُ مزنێں سرکارانی ٹوهێں ردیاں اێش انت که فلسطین ءِ بن‌گپ ءَ که شه دنیا ءِ ٹوهێں بن‌گپان انت، دلگۆشَ نه کن انت. اے سرکاراں گوش انت که «بیمکاری» ءُ «ترندی» ءِ دێم ءَ گر انت ءُ لۆٹ انت که میان‌رۆدرهت ءَ امن کن انت، بلێں باید په دێمداری شه بیمکاری ءُ ترندی ءَ اول باید جنگ ءُ جێڑهانی دێم گرگ بیت.

مولانا عبدالحمید گێش کرت: گهتر ات که بایدن ماں وتی سفر ءَ همارنگ که شه «فلسطین ءِ جتائێن ملک» ءَ گپ کرت، اسرائیلیانَ هم سرپدِ کرتێں که شه فلسطینیانی ڈگاراں در بےانت تاں فلسطین ءِ جتائێں ملک جۆڑ بیت ءُ دو جتائێن ملک گۆں وت کار کن انت.

زاهدان ءِ جمعه ءِ امام ءَ ٹکاٹک گوشت: هچ زلورتے په سفر ءُ هرچ ءَ نه انت. ظالمێں اسرائیل ءُ مظلومێں فلسطینیاں باید گۆں ترانکاری ءُ عدالت ءَ اے مشکل ءَ حل کن انت.

🔹مسلمانێں گهاراں اسلام ءِ رد ءَ وت را پۆش انت

شیخ‌الاسلام مولانا عبدالحمید ماں دگه بهرے شه وتی هبراں به «حجاب» ءَ ماں ملک ءَ اشاره کرت ءُ گوشت ئِے: مزن‌شأنێں قرآن ءَ پچ ءَ را «زینت ءُ شۆکی» زانتگ ءُ فرمائێنتگ ئِے: «یَا بَنِي آدَمَ قَدْ أَنْزَلْنَا عَلَيْكُمْ لِبَاسًا يُوَارِي سَوْآتِكُمْ وَرِيشًا» [اعراف: 26] اۆ آدم ءِ اۆبادگاں! پێداگ کته ما پر شما پۆشاکے که شمے سَترا چێر دنت ءُ یک پۆشاکے زینت ءِ. اگاں اے پچ مه بیت، گڑا انساناں گندگیَ نه بےانت ءُ شه همدگر ءَ جی انت.

واجه ءَ گێش کرت: پچ په جنێنان زینتے. اگاں بےحجاب ءُ باحجابێں جنێناں گۆں وت سنجگ بےانت، آ جنێں که حجاب ءُ پۆشاک دار ایت، په‌براهتر انت. جنێنانی سۆگه کنگ په حجاب ءُ پۆشاک ءَ په جنێنان بےشرپی ئے نه انت.

زاهدان ءِ جمعه ءِ امام ءَ گوشت: لهتێں مردم گتَ کن انت که چادر په جنێنان پدمانگی ءِ سببَ بیت ءُ یوروپیاں که چادر نه دار انت دێمروی اش کرتگ، این گت ءُ دیدانک رد انت. یوروپیانی دێمروی ءِ سبب بےچادری نه انت، بلکه آوان گۆں علم ءُ زانت ءَ دێمروی کرتگ.

واجه ءَ گوشت: مئے سۆگه په تیوگێں بانکاں اێش انت که اسلام ءِ رد ءَ وت را پۆش انت. ما پهرءُشأنَ کن اێں وهدےکه گند اێں ماں فرنچ ءُ جرمنی ءُ امریکا ءَ مسلمانێں جنێناں چادر دار انت، پچےکه معلومَ بیت آ بانک ءَ الله ءِ حکمانی حرمت ءَ داشتگ.