مالزانشت بےلگام ءَ یله کنگ بوتگ/ ماں ایران ءَ راجی ءُ مذهبی حکومت پسو نه دنت/ شهید ءُ ٹپیانی کهولانی حقانی رندگیری روان انت

 شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (۱۰ مهر ۱۴۰۵/ 2 اکتوبر 2026)، گۆں ترۆندێں شرگداری ءَ شه مالزانشت ءِ بےلگامێں یله کنگ ءَ ءُ مردمانی لۆٹانی نادلگۆشی ءَ، په ملک ءِ مزنێں سیاستانی ٹگلێنگ ءُ انچێن سیستمے ءِ زورگ ءَ که راجی ءُ مذهبی مه بیت، کڈن کرت. واجه ءَ همےرنگ گۆں «هونێں جمعه» ءِ سالگشت ءِ یات ءَ ٹکاٹک گوشت که آ پێشامد ءِ شهید ءُ ٹپیانی کهولانی حقانی رندگیری تاں آسر ءَ روان انت.

🔹مالزانشت بےلگام ءَ یله کنگ بوتگ؛ کسے مردمانی گپاں گۆش نه دار ایت

په سنی‌آنلاین ءِ سرهال ءَ مولانا عبدالحمید گۆں اشاره به مالی ءُ رۆزیگی سکی‌سۆریاں درشان کرت: اے رۆچاں مچێں مردماں مالی ءُ مالزانشتی سکیانی آماچ انت ءُ کهولاں هرچءُدرچانی وس ءَ نه دار انت. پوریاگر، کارمند ءُ کاسب ءُ سوداگراں سکیانی دۆچار انت. نهاداں رۆچ‌په‌رۆچ بدل به‌انت ءُ زر ءِ ارزشت جهل کێت؛ همےچیز ءَ مالزانشت ءُ مردمانی زندمان ءِ جاور ءَ گڈءُوڈ کرتگ.

واجه ءَ گۆں راستێں کارمستری ءِ نێستی ءَ گێش کرت: اے هژدری ئێں سکی انت ءُ درا نه‌انت که چه وهدے پراواں  توجیلے درگێجگ بیت تاں گپچلانی دێم گرگ بیت. اے مشکل ءُ سکیانی توجیل درایت، تدبیر ءُ جوانێں کارمستری ات، بلے ارمان که مالزانشت بےلگام ءَ یله کنگ بوتگ ءُ همے چیز ءَ سکیان چنت سر کرتگ. شه دگه نێمگ ءَ بندشاں هم باز گێشتر بوتگ ءُ ملک مالزانشتی بێڑو ءِ دۆچار انت. مردم درد دار انت، پرێشان انت ءُ کسے گپان اش گۆش نه دار ایت، آیاں رۆشنائێں آیوکے په وتی زهگاں ءُ ملک ءَ نه گند انت ءُ اے جاور سک گران انت.

🔹مردماں حق دار انت ملک ءِ سرنبشت ءَ هوار به انت؛ بائد گێشتر ملک ءِ ته ءِ بن‌گپاں دلگۆش بوتێن انت

زاهدان ءِ آدێنگ ءِ خطیب ءَ گۆں کڈن مردمانی بنیاتی حقانی باروا گوشت: مردم حق دار انت وتی جند ئے ءُ ملک ءِ سرنبشت ءِ ته ءَ هوار به انت ءُ گپ جن انت. ملک همے مردمانی انت. بائد گوستگێں دور ءَ مردمانی گپاں گۆش دیگ بوتێن انت ءُ توار اش اشکنک بوتێں، اگں مردمانی گپاں گۆش دیگ بوتێں انت کار ادا سر نه بوت.

واجه ءَ درائێنت: شه الله پاک ءَ لۆٹێں که رۆشنائێں آیۆکے په ملک ءَ بیار ایت، کارمسترانی اگده سک گران انت ءُ بائد ملک ءُ مردمانی پگر ءَ به انت. مئے جاور انچش انت که بائد دگرانی بدل ءَ بس وتی ملک ءُ استمان ءِ پگر ءَ به اێں.

 🔹«هونێں جمعه» ءِ پێشامد ءِ سالگشت ءَ شه وتی کانودی ءُ المی ئێں حق ءَ درگوز نه کن اێں

واجه ءَ ماں دگه بهرے شه وتی هبراں گۆں اشاره به زاهدان ءِ هونێں جمعه ءِ تهلێں پێشامد ءِ سالگشت ءَ گوشت: اے رۆچاں همدپ انت گۆں هشت مهر ءِ پێشامد ءَ که سک تهل ءُ ناوشێں پێشامدےات. مردماں بس په نماز ءَ آت‌ات انت نه په دگه کار ءُ مرادے که پاترپے زانگ بیت یا کسے ءِ بدگوشی بیت، بلے بژن انت که انچێں ظلم ءُ زۆراکی ئے بوت که الله پاک ءِ عرش جسکت.

مولانا عبدالحمید وتی همدردی ءَ گۆں دل ءِ جهلانکی ءَ درشان کنان ءَ گوشت: بازێں نمازوانۆکے شهید ءُ بازێنے ٹپی بوت انت. اے فاجعه په ایران ءِ مردماں هاسکار سیستانءُ بلوچستان ءِ مردماں سک گران ات ءُ هر آزات سسائێں مردمے که سهی بوت، دل ئی پدرد بوت. وهدے که جنازهاں کهولانی دست ءَ رست انت، الله گهتر زانت که حالش چۆن بوت. ما په آ پێشامد ءِ شهید ءُ ٹپیانی کهولاں ءُ ایران ءِ تیوگێں مظلومێں شهیداں دعا کن اێں ءُ گۆں مچێں ایرانیانی درد ءُ غماں شریدارێں.

واجه ءَ کڈن کرت: ایران ءِ مردمانی امێداری شه سرکار ءُ کارمستراں اێش نه ات. اگں آوان ءَ اگدهے هست بائد انت په اے غم ءُ دلگرانیانی جبران ءَ چارگے درگێج انت، بیکه ما په الله پاک ءَ هشتگ. البت اێشی بزانت اے نه انت که ما وتی حقانی رندگیری ءَ نه کن اێں؛ مئے باور ءَ بائد حقانی رندگیری بیت. ما شه وتی ءُ مردمانی المی ئێں حقاں درگوز نه کن اێں ءُ نه بکشائێں. شهید ءُ ٹپیانی حقانی رندگیری برجاه انت ءُ اے تاوانانی بابت ءَ کۆتاه نیایێن.

🔹راجی ءُ مذهبی حکومت ماں ایران ءَ پسو نه دنت؛ گوست ءِ سیاستان یله کن ات

زاهدان ءِ آدێنگ ءِ امام ءَ گۆں اشاره به راجمستری ءِ گواچنی بزانت ءَ گوشت: اے ملک ءِ واهند ایران ءِ پهکێں مردم انت ءُ ملک یک هاسێں مردم یا پاٹی ئے نه انت. همارنگ که مردماں انقلاب ءِ اول ءَ په وتی دل ءَ ءُ نه گۆں زۆر ءَ په «جمهوری اسلامی» ءَ رأی دات، آیوک ءَ هم بائد مردمانی دیدانک جست کنگ بیت؛ راجمستری ءِ بزانت همێش انت که مچێں مردمانی دیدانک ءِ رد ءَ کرد بیت.

واجه ءَ درشان کرت: اگاں اے حکومت اسلام ءِ رد ءَ دێم ءَ آرگ بوتێں ءُ آمید ءُ عدالتے که واجه رسول الله صلی‌الله‌علیه‌وسلم ءُ خلفای راشدینانی زمان ءَ اێردارگ بوت ات، دلگۆش کنگ بوتێں، په ستک گوش آں که اگں آ رۆچ مردمانی 98 درصد ءَ رأی دات ات، مرۆچی 100 درصد ءَ رأی دات. بلے ارمان که مئے کردار سلیقه‌ای ءُ مذهبی ات ءُ چۆشێں لیکه ءُ سسا پسو نه دنت. سلیقه‌ای کرداراں آدگرانی ناوشنودی سوب به انت. اگه چۆشێں سسائاں یله اێں کرتێں مرۆچی اے مشکلانی آماچ نه ات اێں.

مولانا عبدالحمید کڈن کرت: ما بربراں گوشتگ که راجی ءُ مذهبی حکومت په ایران ءَ گۆں رنگ‌رنگێں راج ءُ مذهب ءَ پسو نه دنت. بائد انچێں سیستمے بیت که راجی ءُ مذهبی مه بیت ءُ عدالت برۆبر اێر دارگ بیت. ما گۆں دلسۆچی ءَ گوش اێں که گوست ءِ بےپۆکێں سیاستاں یله کن ات. بائد نۆکێں رهبندے زورگ بیت که گۆں نونێں جاور ءَ یکے بیت.

🔹مردمانی سستێں کرداراں په اسلام ءِ نام ءَ مه کن ات

واجه ءَ گۆں ارمان شه لهتے مردمانی بدگمانی ءَ دین ءِ بابت ءَ، گوشت: مرۆچی اشکنگ بیت که بازێنے شه ایران ءِ مردماں دین ءِ باروا بدگمان بوتگ انت، وهدےکه اے سستی ماں اسلام ءَ نه انت، بلکه مردمانی سستی انت ءُ نه بائد په اسلام ءِ نام ءَ بیت. اسلام عدالت ءُ آمید ءِ دین انت. اگں واجه رسول الله صلی‌الله‌علیه‌وسلم ءُ خلفای راشدینانی زندمان ءَ چارێں گڑا گندێں که عدالت ءُ آمید پوره اێر دارگ بوتگ. من شه ایران ءِ مردماں لۆٹ آں که خدا ءُ دین ءَ یله مه کن انت ءُ راستێں راه ءَ گامجن به انت.

🔹امنیت، چاگرد ءِ تیوگێں پاٹیانی هژدری وازمندی انت

مولانا عبدالحمید وتی هبرانی گڈسر ءَ په هلاکه ءِ امنیت ءِ پهازگ ءَ هاسکار ماں سیمسری ڈیهاں کڈن کرت ءُ گوشت ئی: همارنگ که ماں گوستگێں هپتگ ءَ سۆگه اۆں کرت، بائد هلاکه ءِ امنیت دلگۆش بیت تاں گۆں مشکلاں دۆچار مه بیت. امنیت هژدری انت ءُ مچێں مردمانی سۆب ءَ انت، پهکێں پاٹیاں آئی وازمندگ انت. دێر انت مئے گڑتی همے بوتگ که هلوچ‌گری ءُ دزی ءُ دگه ناامنیاں هلاکه ءِ امنیت ءَ مشکلانی دۆچار کن انت. بائد پهکانی امنیت پهازگ بیت تاں هچ کس ءَ ناامنی ءِ مارشت مه بیت ءُ وڑوڑێں پاٹیاں امنیت ءِ ساهگ ءَ زند گوازێں انت ءُ براسی دارگ بیت.