کیچ: باڈر ءِ بندش ءِ سوب ءَ مھلوک ءِ زھرشانی

بارڈر ٹریڈ ایکشن کمیٹی کیچ: سَے شمبے ءَ بارڈر ءِ بندش ءِ ھلاپ ءَ چائنہ پاکستان اکنامک کوریڈور بند کنگ بیت ءُ داں مئے لوٹ سرجم کنگ بہ بنت.

سر بیتگیں ھالانی رد ءَ مروچی بارڈر ٹریڈ ایکشن کمیٹی ءُ تربت سول سوسائٹی ءِ نیمگ ءَ تربت ءِ شھر ءَ یک روانکے کش اِتگ.

روانک ءَ باپاری مھلوک ءَ ھوار لس مردماں بھر زرتگ ءُ بارڈر ءِ بندش ءِ ھلاپ ءَ اوگام جتگ ءُ آئی ءِ پچ کنگ ءِ لوٹ کرتگ.

زھرشانی ءَ ھواریں بارڈر ٹریڈ ایکشن کمیٹی ءِ باسک علی بکش دشتی ءَ مکران ءَ کَش اِتگیں لکیر ءَ روکپتی بلوچستان ءُ رودراتکی بلوچستان ءِ سیمسر ءِ بندش ءِ سر ءَ گپ کنان ءَ گوشتگ کہ مئے لوگانی آس روکی بند بیان اِنت بلے ھاکماں ھچ پرواہ نیست اِنت گوستگیں ھژدہ روچاں مھلوک سیمسر ءِ دوئیں نیمگاں مھتل اَنت آیانی ھچ ھال پُرسی نیست اِنت.

آئی ءَ گوشت کہ مئے باپاری ءِ دیم ءَ ٹنگر جنگ مارا ھچ رنگ ءَ کبول نہ اِنت ءُ سیمسر پچ کنگ بہ بیت ءُ مھلوک الکاپ ءَ روزگار ءَ ایلگ بہ بیت.

آیاں گوشت کہ ما ھروھد ءَ ھمے لوٹ ءَ کنگ ءَ ایں کہ مئے سیمسر جالگی، گربن کور، دشتک، کھیر توک ءُ عبدوئی ءِ سیمسر مھلوک ءِ آسراتیانی واستا پچ کنگ بہ بنت – بلے مئے لوٹاں درست سرگوز کنگ ءُ مارا ھچ دلگوش کنگ ءَ نہ اَنت.

آیاں گوشت کہ سَے شمبے ءِ روچ ءَ زھرشانی ءَ گیش کن ایں چائنہ پاکستان اکنامک کورڈیڈور سرجم ءَ بند کنگ بیت اِنت.

زھرشانی ءَ سیول سوسائٹی تربت ءِ سروک گلزار دوست، اسلم بلوچ، علی بکش دشتی، امین اللہ مندی، نجیب ڈی ایم دشتی ءُ عابد عمر بلوچ ءَ تران کرتگ.

ھمے وڑ ءَ گوادر ءَ ھم ھور ءِ بند بیگ ءِ سر ءَ مھلوک ءَ زھرشانی کرتگ ءُ سیمسر ءِ پچ کنگ ءِ لوٹ کرتگ.

سرچمگ: ڈی بلوچستان پوسٹ