گچینکاری‌یے سلامت ؤ مردمانِ آرائانِ حفاظت سکّ مهم اِنت

شیخ‌الاسلام مولانا عبدالحمید ماں اهل‌سنتے جمعه نمازے دیوانا (2 اسفند 1398) گوں اشاره به گڑّتی ؤ پریشانیان ماں گوَستگین پارلمانے گچینکاریان به زاهدانِ میتگا په اے گشت شه گچینکاری‌یے سلامت ؤ مردمانِ آرائانِ حفاظتا ماں گردِ مزن‌میتگانْ تأکید کرت.

شه زاهدانِ اهل‌سنتِ جمعه پیشنمازِ دفترِ حال‌رسانی حالا، مولانا عبدالحمید درشان کرت: پارلمانے گچینکاری ماں زاهدان هروقت گوں گڑّتی ؤ پریشانیا هور بوته، دیمے گشتان شکایت هم بوته بلین افسوزنت که به شکایتان رسیدگی ؤ دلگوش نَبوت. واجها گوشت: انقلابے ٹوهین رهشونا مردمانِ آرائانِ حفاظتا شه حقوق‌الناسا زانته، پمیشا امیت وارن که اے گشت شه گچینکاریا خصوصاً ماں زاهدان سالم برجم دارگ بیت ؤ گچینکاری‌یے سلامت ؤ مردمانِ آرائانِ حفاظتے نیمگا دلگوش ببیت.

دارالعلوم زاهدان كارمسترا گوشت: البت ما زانن که زمه‌واران هم شه اے بابتا گڑّتی دارنت. مهم ایشنت که هما فرد یا افرادانِ نام شه صندوقا در بیت که گشترین مردمان آیانَ لوٹنت ؤ رائش داته. واجها تأکید کرت: امانتداری، عدالتے اجرا کنگ ؤ مردمانِ آرائانِ حفاظت مان گچینکاریا شه مهمین چیزان په امنیت ساتتنائت، پمیشا تأکید بیت که ذمه‌واران وتی جهدا په گچینکاری‌یے سلامت ؤ آرائانِ حفاظتا کننت دان مردمانِ آراء بدل مَبَینت. مولانا عبدالحمید درشان کرت: بژن انت که اے گشت شه گچینکاریا بازین کاندیداے شه شورای نگهبانے نیمگا رد صلاحیت بوتگنت، بلین امّا امیت دارن که شه همیشان میانا هما جْوانین ؤ گهترین گچین ببنت.

زاهدانِ اهل‌سنتے جمعه‌ی پیشنمازا شرکت ماں گچینکاریا یک وظیفه‌ی زانتِ ؤ شه پهکان لوٹتِ که به اے گچینکاریا شرکت کننت ؤ به وتی دل‌لوٹین کاندیدان رای دیَنت. واجها همےپیم ناواننده‌یانه گوشت که په وتی رای حفاظتا هما کسّا که آیی سرا پروسه دارنت گوں وت برنت.

په حفاظت شه ویروس کرونایا به پیغمبرے توصیه‌ئا ماں دیم‌گیری شه ناجوڑی‌یے تالان بیگا عمل بیت

مولانا عبدالحمید اے دیوانے توکا گوں اشاره به ویروس کرونای آیگا به ملکے تها، پیامبر صلّی‌الله‌علیه‌وسلّم توصیه‌ئا گوں اے پیم ناجوڑی‌یان یات کرت ؤ گوشته: په دیم‌گیری شه ویروس کرونای تالان بیگا به اے پیامبرے حدیثا عمل بیت که فرمایش کرت: هر میتگے تها که وبا آت،‌ آیی مردم نباید شه آ میتگا ڈنّا برونت ؤ آدگه میتگانِ مردم هم نباید اؤدا بیاونت، پچےکه گوں اے شت ؤ آتان ناجوڑی به آدگه میتگ ؤ منطقه‌یان تالانَ بیت. زاهدانِ اهل‌سنتے جمعه‌ی پیشنمازا گیش کرت: یکّے شه ویروس کرونای تالان بیگے دلیلان به آدگه ملکان همے بوته که به اے حدیثا دلگوش نبوته ؤ بازئنے که شه چین جِستَگنت اے ناجوڑی‌یا دگه جا تالانش کرته.

واجها گوشت: مے توصیه به درّین مردمان ایشنت که مَترسنت ؤ به الله بروسه کننت، پچےکه تا آ وهدے که اللهٔ لوٹ ؤ اراده مبیت هچّ ناجوڑی‌یے جامعه‌یے تها تالانَ نبیت، ویروس کرونا هم اللهٔ مخلوقنت و آیی اختیار الله دستاینت. مولانا عبدالحمید گیش کرت:‌ توصیه‌ءَ بیت که په حفاظت شه ویروس کرونا ؤ آدگه ناجوڑی ؤ آفتّان باز صدقه دئِت، وتی مالانِ زکاتانَ دئت، نمازانَ برجا دارت الله‌ئا ذکر کنِت، توبه ؤ استغفار کنِت، شه رڈّین کرداران پلگار بیت ؤ الله ؤ مردمانِ حقانه ساتت.

ادلبِ نوکین پیشامدان پهک انسانانِ دلانَ ریش کرته

شیخ‌الاسلام مولانا عبدالحمید وتی هبرانِ گڈسرا به ادلبِ سوریه‌ی هنونیں جاوران اشاره کرت و گوشته: استان ادلب نوکین پیشامدان پهکین آزات و غیر آزاتین انسانانِ دلارا ریش کرته. واجها گیش کرت: شه بمب گواری‌یے واستا به این منطقه‌یا نزّیک به یک میلیون نفر آواره بوته که آیانِ میانا جنین و گونڈين زهگ و پیرین‌انت ؤ بازینے شه ایشان شه بمب گواری یا سردی‌یے واستا بیران بوتگنت. گجاونت آ آگاه‌ئین وجدان که په اے بےوسین انسانان رحم کننت؟ زاهدان اهل‌سنتے جمعه‌ی پیشنمازا گوشت: جنین ؤ‌ زهگ ؤ بےوسین انسانانِ سرے ظلم کنگ باز بدین آسرے داریت. بازین انسانے گتَ کننت که اللهٔ نگندیت و شه اے پیشامدان سهی نهنت، ماں حالے که هچّ وهد اےرنگ نهنت، الله تعالی مچِّ پیشامدانَ چاریت ؤ سهی انت ؤ روچے رسیت که ظالمانَ گوں عذابا گٹَّ کنت.

واجها گوشت:‌ ما پهکان بایدات که شه ظلم ؤ نابرابری ؤ جرمے آسرا ترسَّن، پچےکه آسرِ اے دنیا ؤ آ دنیای‌یے بیرانی و ناکامی انت، اللهٔ عذاب اے دنیا ؤ قیامتا ظالم ؤ بےرحمانَ گیت.