دولت په مَرز‌نندۆکانی مشکلاتِ حلّ کنگا دلگۆش بکنت

شیخ‌الاسلام مولانا عبدالحمیدا مں یک نامه‌اِے په اێرانِ راجکماش/رئیس‌جمهور ڈاکٹر روحانیا نبشتگ، په مرزنندوکێں مردم خاصکار سیستان و بلوچستان و کردستانِ «بانۀ» شهرِ مردمانی معیشتی مشکلاتا اشاره کرتگ و گوشتگی که دولت په اِے مردمانی مشکلاتِ حل‌کنگ و گیشّێنگا دلگۆش بکنت.
واجها وتی نامه تها «مرزانی بندگ» اِے مشکلاتِ اصلی علت زانتگ و گوشتگی: مرزی استانان تها مردماں چه همے مرزی تجارت و باپاری راهاں وتی زندگی گوازیننت، پێسرا مرزی تجارت مردمانی دستا بوتگ، بلے هنّو مرز بندگ بوتگنت و لهتے اداره و ارگانا اِے تجارت وت دستا گپتگ و مردم اِش کرّا جتگنت.
مولانا عبدالحمیدا دێمترا وتی نامه تها گوشتگ: کار و دندا مرزی استانانی تها سکّ مهم و ضروری اِنت، آ دولتی اداره‌یانے که مرزی باپاری و تجارتش وتیگی کرتگ آیانی سودِ برّگ، ملکِ کرّ و گوَرِ مردمانی فائده اِنت.
واجها گڈسرا چه راجکماشا لۆٹتگ که په با غیرتێں مرزدارانی مشکلات و پریشانیانی حل کنگا اشتاپ بکنت.