واجه مولانا سلیم‌الله خان، دیم په وتی ابدمانیں جاها رهادگ بوت

شیخ‌الحدیث مولانا سلیم‌الله خان، پاکستانِ “وفاق المدارسِ” کارمستر ؤ جامعه فاروقیه‌یِ مدیر دوشی وفات بوت.

په سنی‌آنلاینِ هالکاریا، نقل چه پاکستانی رسانکاں مولانا سلیم‌الله خان، رند چه یک دوره‌اے نادوراهیِ کشّگا، دوشی یکشمبه ۲۶ دی ۱۳۹۵، وتی عمرِ ۹۶ سالگیا کوڑئیں دنیائی یل دات.

واجه چه جهان اسلامِ ٹوهیں علمی شخصیتاں بوتگ ؤ شاگردی مختلفیں ملکاں دینی جهد ؤ هزمتا مشغول انت.
په پاکستانِ رسانکانی هالا مروچی اولی نمازجنازه ساهت هشتا جامعه فاروقیه‌ئا وانگ بوتگ، دومی جنازهِ نماز هں مرچی ظهرا جامعه فاروقیه‌یِ دومی جاها وانگ بوت.
بازیں علمی ؤ سیاسی واجهاں چوشکه واجه مولانا عبدالحمید دارالعلوم زاهدانِ مدیرا، وتی اپسوز ؤ دلپدردی چه مولانا سلیم‌الله خانِ وفاتا درشاں کرتگ ؤ اے واجهِ روگ مزنیں تاوانے په جهان اسلاما زانتگ.
مولانا سلیم‌الله خان، ۲۵ دسمبر سال ۱۹۲۶ ئا هندوستانِ اتراپردیشِ ایالت مظفرنگرِ شهرا دنیائا یهتگ.
واجه‌ئا هفتاد سال پیش سال ۱۹۴۷ ئا دارالعلوم دیوبندا وانگ دربرت.
مولانا سلیم‌الله خانا دیوبندا شیخ‌الاسلام مولانا حسین احمد مدنی، مولانا اعزارعلی و مولانا محمد ادریس کاندهلوی رحمهم الله ءِ گورا درس وانتگ.
مولانا رند چه وانگِ دربرگا دارالعلوم تندواله‌یار، دارالعلوم کراچی ؤ جامعة العلوم الٳسلامیة بنوری تاونا درس داتگ.
سال ۱۹۶۷ئا مولانا سلیم‌الله خانا “جامعه فاروقیه” جوڑ کرت ؤ تا وتی عمرِ آسرا همے دینی وانگجاها علوم دینی درس داتنت.