واجه مولانا عبدالحمیدا وتی دل‌پدردی چه واجه مولانا صلاح‌الدین علی‌زهیِ شهادتا جارجت

سنی‌آنلاین/ شیخ‌الاسلام مولانا عبدالحمیدا مَں پیگامے وتی دل‌پدردی چه مولانا صلاح‌الدین علی‌زهی (بلوچ) اوگانستانِ نیمروزِ زرنجِ شهرِ ٹوهیں واجه ؤ زانتکارِ شهادتا درشاں کرت ؤ واجهِ شهادت په واهگداراں تسلیت گوشت.
یک سلاه‌بندیں مردیا پریری سےشمبے 25 آبان همدپ گوں 15 نوامبر 2016، مولانا صلاح‌الدین واجه‌ِ لوگِ تها شهید کرت.

?مولانا عبدالحمیدِ پیگام که زی مَں واجهِ جنازهِ نمازا وانگ بوت، اِشنت:
«وَبَشِّرِ الصَّابِرِين*َالَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ* أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ»
زبردستیں خطیب، روشنیں واجه، مولوی صلاح‌الدین موحّدِ ترور ؤ شهید کنگا منا ؤ دارالعلوم زاهدانِ استاداں سکّ پریشان ؤ دل‌پدرد کرت. ما را باز امیت هستت که اِے واجه نیمروز ؤ اوگانستانا گیشتر روشنایی ؤ هدایتِ سبب ببیت، بلے الله پاکِ قضا ؤ قدر چوش بوت که اِے ورنائیں واجه، اللهِ رحمتانی چیرا جاه گریت ؤ بلکیں حکمت همیش اَت که واجهِ شهادت آ ملکِ مردمانی آگاهی و چم‌پچیِ سبب بیت.
بے شک اِے گرانیں پیشامد، دینداریں مردم، خاصکار عالمانی مسئولیت ؤ وظیفه‌یا گیش کنت که هں وتی کاراں بکننت ؤ هں مرحومِ کاراں دیما ببرنت.
من گوں وتی همدردیِ پیشکنگا، واجهِ شهادتا په نیمروزِ مردم، واجهیں عالم، مرحومِ همکاراں مَں احیاءالعلومِ زرنجِ دینی مدرسه‌یا ؤ خاصکار واجهِ سیاد ؤ لوگی مردماں، واجهِ برات مولوی علاءالدین علی‌زهیا تسلیت گوشان ؤ وتا غمانی شریدار زاناں.
منا امیت اِنت که واجهاں وتی دل‌آرامیا حفظ کننت ؤ گوں تمام وتی توانا اسلامِ هزمت ؤ چاگردی/اجتماعی مشکلاتِ حل کنگا که آ واجهِ کار بوتگ، مشغول ببنت.

✍ (مولانا) عبدالحمید
زاهدانِ جمعه‌یِ پیشنماز ؤ دارالعلومِ کارمستر