ٹرمپ، امریکه‌یِ گوستگیں راج‌کماشانی غلط ؤ ردیاں مکنت

شیخ‌الاسلام مولانا عبدالحمیدا مَں یک بهرے چه جمعه ‌(21 آبان 1395)ءِ گپاں په دونالد ٹرمپِ گچیں‌بوگ مں امریکه‌یِ گچیں‌کاری ؤ انتخاباتا اشاره کرت ؤ چه امریکه‌یِ گوستگیں راج‌کماشانی غلطی ؤ ردیاں په ٹروریسمِ دیمگیریا گله کرت ؤ چه آیانی سیاستانی رندگیریا مکن کرت.
په سنی‌آنلاینِ هالکاریا واجه مولانا عبدالحمیدا گوشت: اِے روچاں امریکه‌یِ گچیں کاری ؤ انتخاباتِ گپ اِنت. مَں اِے گچیں کاریا یک مردے گچیں کنگ بوتگ که چه مسلماناں سکّ بد بارت ؤ‌ کمے پیشترا گوشتگتی: اگه من راج کماش بباں، هچ مسلمانیا اجازت ندیاں که امریکه‌یا مان ببیت.
زاهدانِ جمعه‌یِ پیشنمازا دیم په امریکه‌یِ نوکیں راج‌کماشا گوشت: مَے وصیت په امریکه‌یِ نوکیں راجکماشا اِشنت که اگه لوٹیت گوں ٹروریسما جنگ بکنت و آئیِ دیما بگریت، باید اولا بچاریت که ٹروریسم چه کجا ؤ چه پیم جوڑ بوت؟ آ لهتے مسلمان که گیشین کننت، پرچے گیشین کننت؟ نوکیں راج‌کماش گوستگیں راج‌کماش (بوش ؤ اوباما)ءِ غلط و ردیانا تکرار مکنت.
واجه مولانا عبدالحمیدا «روسیایِ اُرُش مَں اوگانستانا» ؤ‌«فلسطینِ اشغال کنگ چه اسرائیلِ نیمگا» دو سبب په ناامنی ؤ افراطا نام گپتنت ؤ گوشتی: اسلامی ملکانی مشکلات چه همودا بنگیج بوتنت که شوروی (روسیا) یک وت‌واجهیں ملکے سرا اُرُش کرت ؤ اوگانستانِ مردمی جت ؤ بیگواه کرتنت.
واجها گیش کرت: ٹروریسمِ گیش بیگِ دومی سبب مَں دنیایا فلسطینِ اشغال کنگ ؤ فلسطینی مسلمانانی جنَگ ؤ چوپگ اَت که اسرائیلا کرت. اسرائیلا مَں اِے ملکا فلسطینیانی هبرانی دیم گپت ؤ په آیاں که وتی حقش لوٹت دلگوشش نکرت.
مولانا عبدالحمیدا سومی سبب په ٹروریستِ جاه جنگا “ظالمیں حکومت که راج ؤ مذهبانی آزاتیِ دیمش گپت” زانت ؤ گوشتی: افراط ؤ ترندرویِ سومی سبب ظالم ؤ وَتسریں حکومت اِتنت که دستش گوں غربی ؤ رونندی ملکاں هور اِتنت، راج ؤ مذهبانی آزاتیانی دیمش گپت ؤ په آیانی حقّا دلگوشش نکرت.
دارالعلوم زاهدانِ مدیرا دیما گوشت: اگه امریکه‌یِ نوکیں راجکماش وتی هما ضد مسلمانی سیاستا دیما ببارت، بزاں لوٹیت که تمامیں مسلمانانا په افراط ؤ ترندوریِ نیمگا بکَشّیت.
مولانا عبدالحمیدا گوشت: اگه ٹرمپ لوٹیت که خوبیں راج‌کماشے ببیت، باید بزانت که اول سرا فلسطین باید ویل کنگ ببیت. باید تمام راج ؤ مذهبانی لوٹ ؤ واهشاں گوشدارگ ببنت. عدالت ؤ آزاتی دنیایا امن کنت.
واجها گیش کرت: امریکه‌یِ راجکماش، روسیا ؤ دگراں بزاننت تا وهدے که مردمانی حقّیں آزاتیانی دیم گرگ ببیت ؤ ظلم ؤ تبعیض ببیت ؤ په مردمانی لوٹاں نادلگوشی کنگ ببیت، دنیا هچ‌بر امن نبیت. گوں ظلم و بےانصافیا آ که افراطی ؤ ترندرو نهنت، هما هں ترندرو بینت.
زاهدانِ جمعه‌یِ پیشنمازا گڈسرا گوشت: اگه یکے لوٹیت گوں اسلاما دژمنی بکنت، بزانت که الله متعال بیرگروک و انتقام گروکے. الله آیانی گردنا که لوٹنت گوں اسلاما دژمنی کننت و حقِّ چراغا هاموش کننت پروشیت.