اسلامِ شریعت په ظاهر و باطنِ پاکیا تاکید کنت

شیخ‌الاسلام مولانا عبدالحمیدا وتی اِے هپتگِ جمعه‌ی گپاں په انسانِ ظاهر و باطنِ پاکیا تاکید کرت و گوشتی که دلگوش کنگ په اِے هر دوئیناں په اللهِ رضامندیِ دستا آرگا ضروری اِنت.
زاهدانِ جمعه‌ی پیشنمازا (7 آبان 95/ 28 اکتوبر2016)ءِ گپاں گوشت: پیسر چه پیگمبرِ مبعوث بیگا انساناں گوں وڑوڑیں ظاهری و باطنی، اخلاقی و عقیده‌ای نجاست و پلیتیاں گرپتار اِتنت.
واجه‌ئا دیما گوشت: الله تعالی ئا گوں پیگمبرِ بعثتا ظاهری و باطنی پاکی انساناں دات. قرآن و سنتِ حکمانی تها باز تاکید په هر دوئیں پاکیاں بوتگ. رند چه سوره «علق» ئا اولی سوره «مدثّر» اَت که نازل بوت و مَں آئیا په هر دوئیں پاکیاں تاکید بوتگ.
مولانا عبدالحمیدا گیش کرت: آ جاهاں که چه طهارت و پاکیا هچ نامے نیست اَت، اسلاما حکم دات که هپتگے یک‌برے ضرور جان شود اِت و همک جمعه‌ئا غسل کنگ سنت گوشت. قرآن و سنتِ تعلیم و پنت مسلمانانا په جانِ شودگ، پاکیں پُچِّ گورا کنگ، مسواکِ جنگا تاکید کرتگ. مسواکِ اثر سک باز اَنت، بازیں نادوراهی یے چه دپا جاه جننت. اسلاما په دپ و دماگِ شودگ و پاک کنگا باز تاکید کرتگ.
واجه‌ئا دیما بیان کرت: په نمازا اسلاما حکم داتگ که وضو بگرت. وضو روژنائی کاریت. وهدے که شما وضو گرت، تمامیں گناهاں چه شمئے جانا رچ اَنت. وضو گونڈیں گناهانا شودیت و ٹوهینانی سبک کنت.
مولانا عبدالحمیدا «توبه» گهتریں راه په باطن و دلِ پاکیا زانت و گوشتی: الله تعالی ئا آ انسان که توبه کنت دوست بیت. حدیثا یهتگ: تمامیں بنی‌آدم گناه کننت و گهتریں گنکار هما اَنت که توبه کننت. دست و دیم و جانِ شودگ انسانِ ظاهرا پاک کنت و توبه انسانِ باطنا پاک کنت.
زاهدانِ جمعه‌ی پیشنمازا گوشت: ایمانِ نیم طهارت و پاکی اِنت. الله تعالی ئا هما پیم که باطنِ پاکی دوست بیت، همے پیم ظاهرِ پاکی هں دوست بیت. ظاهری پاکیا په باطنِ پاکیا تاثیر هست. انسانے که ظاهری پاکی و طهارتا هیالداری نکنت، نادوراه بیت و نتوانت الله ئا عبادت بکنت و همے پیم نتوانت وتی دنیایا اداره بکنت.