کوئٹه‌یِ پولیس هیلکاری شهدربرجاهِ اُرشا کم سه کم 61 نپر بیراں بوت

پرندوشی دوشمبے (3 آبان-23 اکتوبر2016) مَں یک تروریستی اُرشے کوئٹه‌یِ پولیس هیلکاری شهدربرجاها کم سه کم 61 نپر کشگ و 150 نپر دگر ٹپی بوتنت. سَے روچ پاکستانا سوگ اعلاں بوتگ.
په سنی‌آنلائنِ هالکاریا نقل چه پاکستانی رسانکاندراں، مَں اِے تروریستی اُرشا سے نپرا که وت‌ترتاکیں بمب اِش وتا بستگ مَں کوئٹه‌یِ پولیس هیلکاری شهدربرجاها وتش تراکینتگ. بیراں بیتگینانی جنازهِ نمازا ملکءِ ٹوهیں کارمستراں چوشکه مزن‌وزیر نوازشریف حاضر بوتگنت.
په اِے اُرشِ چست واِیرا کوئٹه‌یِ فرمانداریا گوں نواز شریفءِ سروکیا دیوانے برجم دارگ بوتگ. مَں اِے دیوانان “خالد فرید” پاکستانِ آژانس اطلاعاتِ کارمسترا گوشتگ که فوجی شهدربرجاهِ‌ حمله‌یِ نقشه مَں دهلی‌نو- هنڈیا کشّگ بوتگ و اوگانستانِ امنیت ملیِ هوربندا دیگ بوتگ.
پاکستانِ روتاکانی هالا اِے اُرش پاکستانِ طالبانی یک پاٹیا وتیگی کرتگ. همے پیم گوشگ بیت که دگه گروهے په نام “لشکر جهنگوی جهانیا” هں مَں اِے اُرشا دست بوتگ. اوگانستان و پاکستانِ داعشِ گروها هں په وت زرتگ. پاکستانِ وزیر دفاعا گوشتگ: اوگانستانِ کارمستراں اِے اُرشا کمیں چیزے مسمجنت.
جنرال شیرافغان چه کوئیٹه‌ی امنیتی واکاں گوشتگ: مَں اِے اُرشا “لشکر جهنگوی جهانیا” دست بوتگ. آیاں وتی حکم چه وتی رهشوناں که مَں اوگانستانا چیر اَنت گپتگنت.
تهنا همے سالا اِے ششمی تروریسیتی اُرش اِنت که مَں رودرهتی بلوچستانا پیش کئیت و بازیں مردمے بیران بیت.
دو ماه پیش مَں یک تروریستی حمله اِے نادراهجاهے دپا مَں کوئٹه یا 75 نپر بیراں بوت. بازیں رهشون و سیاسی گلّے چه امنیتی واکانی کم کاریا سک گله کرتگ.