حج میں ایرانی حاجیوں کی غیرحاضری مسلم امہ کے مفادات کے خلاف ہے

ایران کے ممتاز سنی عالم دین نے شاہ سلمان بن عبدالعزیز کے نام خط لکھتے ہوئے درخواست کی ہے ایرانی حاجیوں کے حج میں شرکت کے اسباب فراہم کریں۔
سنی آن لائن نے شیخ الاسلام مولانا عبدالحمید کی ویب سائٹ کے حوالے سے لکھاہے، خطیب اہل سنت زاہدان کے خط میں آیاہے: ایرانی قوم ایک دیرینہ تہذیب کے حامل ہے اور یہ حجاج ہرگز بیت اللہ الحرام کے حاجیوں کے آنے جانے میں دخل اندازی نہیں کریں گے اور حج آپریشن کے قوانین کی پاسداری میں تعاون کریں گے۔
سعودی عرب کے شاہ کے نام خط کے ایک حصے میں عالم اسلام کے کشیدہ حالات کی جانب اشارہ کرتے ہوئے رابطہ عالم اسلامی کے رکن نے لکھاہے: موجودہ حالات میں جب فرقہ واریت، اختلافات اور بدگمانیاں عالم اسلام میں موجزن ہیں اور دشمن بھی اختلافات بڑھانے کی کوشش کررہے ہیں، ایرانی حاجیوں کی عدم موجودگی کسی طرح مسلم امہ کے مفادات کے مطابق نہیں ہے۔
شاہ سلمان کو مخاطب کرتے ہوئے مولانا عبدالحمید نے کہاہے: درخواست ہے مسلم امہ کے اتحاد، اختلافات کم کرنے، دوطرفہ تعلقات کو معمول پر لانے اور احترام کے ساتھ سفارتخانے کھلوانے کی خاطر ایرانی حاجیوں کے مشرف بحج ہونے کے اسباب فراہم کریں۔
حضرت شیخ الاسلام کے خط میں تاکید کی گئی ہے: عالم اسلام کے حکام کی دوراندیشی اور فراخدلی سے اللہ تعالی کے فضل و کرم سے فرقہ واریت اور اختلافات کی آگ بجھ جائے گی اور دشمنی و نزاع کی جگہ دوستی آئے گی۔
خط کے آخر میں آیاہے: یہ بات واضح ہے کہ اگر عالم اسلام کے یہ دو اہم ملک (ایران اور سعودی عرب) اکٹھے ہوں، تو ممالک عالم اسلام کے بہت سارے مسائل حل کرنے میں کامیاب ہوں گے۔