ایران: اشاعت التوحید سراوان کے مہتمم انتقال کرگئے

سراوان(سنی آن لائن) ایرانی بلوچستان کے شہر سراوان میں واقع ’اشاعت التوحید‘ مدرسے کے مہتمم مولانا غلام رسول بارکزہی جمعرات بیس اگست کو انتقال کرگئے۔

سنی آن لائن کی رپورٹ کے مطابق، مولانا غلام رسول بارکزہی صوبے کے ممتاز علمائے کرام میں شمار ہوتے تھے۔ طویل علالت کے بعد جمعرات بیس اگست (پانچ ذوالقعدہ) کو آپ کی روح پرواز کرگئی۔
مرحوم کی نمازجنازہ اشاعت التوحید سراوان میں صوبے کے ممتاز علمائے کرام بشمول شیخ الاسلام مولانا عبدالحمید، شیخ الحدیث مولانا محمدیوسف، مولانا محمدعثمان خاشی اور معاشرے کے دیگر طبقوں کی موجودی میں ادا کی گئی۔ نمازجنازہ کی امامت شیخ الاسلام مولانا عبدالحمید نے کی۔
ملک کی مختلف دینی وسماجی شخصیات نے تعزیتی پیغام جاری کرکے مولانا بارکزہی کو متقی اور عابد و زاہد عالم دین یاد کیاہے۔ علمائے کرام نے اشاعت التوحید سراوان کے اساتذہ وطلبہ اور مرحوم کے اہل خانہ سے بطور خاص تعزیت کا اظہار کیاہے۔