چارلس کی رسم تاج پوشی میں تلاوت کلام پاک کی تجویز

برطانیہ کے ایک اعتدال پسند عیسائی پادری نے تجویز دی ہے کہ شہزادہ چارلس والدہ کی وفات کے بعد اپنی رسم تاج پوشی میں تلاوت قرآن کریم کا خصوصی اہتمام کریں تاکہ تاج برطانیہ کے بارے میں مسلمانوں کے محبت کے جذبات بھی سمیٹے جا سکیں۔

العربیہ ڈاٹ نیٹ کے مطابق یہ منفرد تجویز برطانیہ کے لارڈ ہریس نامی ایک عیسائی پادری نے دی ہے جو ماضی میں آکسفورڈ یونیورسٹی میں بشپ کے عہدے پربھی فائز رہ چکا ہے۔ اخبار ‘ڈیلی میل’ کے مطابق حال لارڈ ہریس سائوتھ ورک پادری کونسل کے نائب بشپ کے طور پر اب بھی خدمات انجام دے رہے ہیں۔ ان کے برطانوی حکمراں خاندان کے ساتھ بھی دوستانہ مراسم ہیں۔
انہوں نے حال ہی میں بشپ کونسل کے اجلاس کے دوران یہ تجویز پیش کی کہ شہزادہ چارلس اپنی والدہ کی وفات کے بعد رسم تاج پوشی کے موقع پر زیادہ مہمان نوازی کا مظاہرہ کریں۔ مسلمانوں کے بارے میں زیادہ فراخ دلی کا مظاہرہ کرتے ہوئے تاج پوشی تقریب میں تلاوت قرآن پاک کا اہتمام کرائیں۔
برطانوی اخبار کے مطابق عیسائی پادری کی اس تجویز پر ملک کے شدت پسند مذہبی حلقوں میں شدید ردعمل بھی سامنے آیا ہے۔ برطانوی عیسائی پادریوں انڈریا مینچلو ولیمز اور سائمون کالفرٹ کا کہنا ہے کہ برطانیہ میں شاہی رسم تاج پوشی کی روایت صرف عیسائی مذہب کی وراثت سمجھی جاتی ہے۔ برطانیہ کے کسی بھی چرچ میں رسم تاج پوشی کی تقریب میں قرآن کریم کی تلاوت ہماری روایات کے خلاف ہے۔
خیال رہے کہ بیس سال پیشتر شہزادہ چارلس نے خود بھی کہا تھا کہ میری خواہش ہے کہ لوگ مجھے ایمان کا دفاع کرنے والے برطانوی بادشاہ کے طور پر یاد رکھیں۔ سنہ 2006ء میں انہوں نے ایک تقریب سے خطاب میں کہا کہ میں چاہتا ہوں کہ میری رسم تاج پوشی میں متعدد مذاہب کےلوگ شریک ہوں۔ میں سنہ 1953ء میں اپنی والدہ کی رسم تاج پوشی کے مقابلے میں اپنی تاج پوشی کو زیادہ موثر بنانا چاہتا ہوں۔

العربیہ ڈاٹ نیٹ