اہل سنت ایران سوگ میں؛ دارالعلوم زاہدان کے سینئر استاذ انتقال کرگئے

دارالعلوم زاہدان کے استاذالحدیث اور اہل سنت ایران کے رہنما مولانا احمد ناروئی آج سترہ مارچ دوہزارچودہ (15 جمادی الاولی) کو ظہر سے پہلے ایک سانحے میں انتقال کرگئے ہیں، انا للہ وانا الیہ راجعون۔

اہل سنت ایران کی خبررساں ویب سائٹ’سنی آن لائن‘ کی رپورٹ کے مطابق زاہدان کے مضافات میں پیش آنے والے المناک واقعے میں زاہدان کی سنی برادری کے عارضی خطیب اور دارالعلوم زاہدان کے مہتمم شیخ الاسلام مولانا عبدالحمید کے معاون اور داماد انتقال کرگئے ہیں۔ اس سانحے میں ان کے نوعمر بیٹے زخمی ہوچکے ہیں۔

مولانا احمد ناروئی کا جنازہ کل زاہدان میں اہل سنت کی مرکزی عیدگاہ میں دس بجے پڑھاجائے گا۔

ہمارے نامہ نگار کے مطابق مولانا احمد کے ایک قریبی ساتھی ’خدانظر ناروئی‘ اسپتال پہنچنے سے قبل زخموں کی تاب نہ لاتے ہوئے اپنے خالق حقیقی سے جا ملے ہیں۔

دوسری جانب بعض خبررساں اداروں نے دعوی کیاہے اس سانحے میں دارالعلوم زاہدان کے ناظم تعلیمات مولانا عبدالغنی بدری بھی زخمی ہوچکے ہیں جو سراسر غلط ہے۔ مولانا بدری ہرگز مرحوم مولانا احمد کے ساتھ نہیں تھے اور اب خیریت سے ہیں۔

سنی آن لائن ٹیم اس اندوہناک واقعے پر شیخ الاسلام مولانا عبدالحمید، ایرانی اہل سنت، دارالعلوم زاہدان کے اساتذہ وعملہ اور مولانا کے اہل خانہ سمیت ان کے تمام متعلقین اور احباب سے تعزیت کا اظہار کرتی ہے۔ اللہ تعالی سے دلی دعا ہے مرحوم کو علو درجات عطا فرمائے اور ان کی مکمل مغفرت فرماکر شہدا وصالحین سے انہیں محشور فرمائے ، آمین۔

مولانا احمد کی گاڑی کی تصویر سانحے کی بعد