اسرائیلی فوج کا ڈرون حملہ، غزہ میں اسلامی جہاد کا کمانڈر شہید، تین زخمی

فلسطینی شہرغزہ کی پٹی میں اسرائیلی فوج کے ڈرون طیارے کے میزائل حملے میں اسلامی جہاد کے عسکری ونگ القدس بریگیڈ کا ایک سینیئر کمانڈر شہید اور تین مزاحمت کار زخمی ہو گئے ہیں۔

فلسطینی وزارت صحت کے ترجمان ڈاکٹر اشرف قدرہ نے”مرکزاطلاعات فلسطین” کے نامہ نگار کو بتایا کہ میزائل حملہ پیر کی شام شمالی غزہ کی پٹی میں بیت حانون میں کیا گیا جس میں اسلامی جہاد کے کمانڈروں کو نشانہ بنایا گیا تھا۔

ترجمان نے کہا کہ صہیونی فوج کے ایک بغیر پائلٹ کے ڈرون طیارے نے جامع مسجد الاستقامہ کے قریب شارع السکہ پر میزائل حملہ کیا، جس کے نتیجے میں القدس بریگیڈ کا کمانڈر 21 سالہ مصعب موسیٰ الزعانین شہید اور تین دوسرے مزاحمت کار زخمی ہو گئے۔ زخمیوں کو  بیت حانون اور  بیت لاھیا کے اسپتالوں میں منتقل کیا گیا ہے۔ ایک زخمی کی حالت تشویشناک بیان کی جاتی ہے۔

مرکز اطلاعات فلسطین