وسطی لندن میں برطانوی انٹلیجنس دفاتر کے قریب ہیلی کاپٹر گر کر تباہ

وسطی لندن میں زیر تعمیر بلند و بالا رہائشی عمارت کے ساتھ کھڑی کرین سے ہیلی کاپٹر ٹکرانے سے دو افراد ہلاک جبکہ دو دوسروں کو زخمی حالت میں ہسپتال منتقل کر دیا گیا ہے۔
برطانوی پولیس نے فضائی حادثے میں دہشت گردی کے امکان کو مسترد کرتے ہوئے بتایا کہ ہیلی کاپٹر گرنے سے جہاز کے ڈھانچے اور گرنے کی جگہ لگنے والی آگ پر ساٹھ سے زیادہ فائر فائٹرز نے قابو پا لیا ہے۔

عینی شاہدین کا کہنا ہے کہ ہیلی کاپٹر میں ایک نامعلوم پائیلٹ سوار تھا۔ مقامی وقت کے مطابق صبح آٹھ بجے یہ ہیلی کاپٹر یورپ کی بلند و بالا عمارت پر تعمیراتی کام کرنے والی کرین سے ٹکرایا۔ جائے حادثہ برطانوی انٹلیجنس کے دفاتر اور زیر تعمیر امریکی سفارتخانے کے قریب واقع ہے۔ اس عمارت میں خلیجی ملکوں کے متعدد شہریوں نے فلیٹس اور دوسری ریئل اسٹیٹ میں سرمایہ لگا رکھا ہے۔

عینی شاہدین کے مطابق واکس ہال ٹرین اسٹیشن کے قریب زیر تعمیر عمارت اور دریائے تھیمز کے کنارے ہونے والے اس حادثے میں دو گاڑیوں میں بھی آگ لگ گئی جبکہ پوری فضا میں دھواں پھیل گیا۔

لندن
العربیہ ڈاٹ نیٹ