مولانا اسلم شیخوپوری ساتھی سمیت شہید

کراچی(کراچی اپ ڈیٹس) دھورا جی میں نامعلوم افراد کی جانب سے کار پر فائرنگ کے نتیجے میں معروف عالم دین مولانا اسلم شیخوپوری ساتھی سمیت شہید ہوگئے ہیں۔
تفصیلات کے مطابق مولانا اسلم شیخوپوری بہادر آباد میں درس کے لیے جارہے تھے کہ دھورا جی کے مقام پر مسلح دہشت گردوں نے ان کی کار AFU655 پر اندھا دھند فائرنگ کردی جس کے نتیجے میں مولانا اسلم شیخوپوری، سفرین، نجم الدین اور وزیر علی قادری شدید زخمی ہوگئے، زخمیوں کو فوری طور پر جناح اسپتال منتقل کیا گیا تاہم مولانا اسلم شیخوپوری اور سفرین راستے ہی میں دم توڑ گئے۔ واقعے کے بعد بہادر آباد میں شدید خوف و ہراس پھیل گیا ہے۔
مولانا اسلم شیخوپوری کی عمر 54 سال تھی وہ اپنے مکتبہ فکر میں معروف اور بڑے عالم دین تصور کیئے جاتے تھے۔ مولانا نے دین تعلیم جامعة العلوم اسلامیہ بنوری ٹاﺅن سے حاصل کی، ان کے استادوں میں مولانا یوسف بنوری، مولانا یوسف لدھیانوی، مولانا احمد الرحمان دیگر شامل تھے۔ وہ جامعہ بنوری ٹاﺅن سائٹ میں 25 سال تدریس کے فرائض انجام دیتے رہے اور گذشتہ 7 سالہ جامعہ الرشید میں استاد کی حیثیت سے خدمات دے رہے تھے، وہ عالم ہونے کے ساتھ ساتھ معروف کالم نگار اور کئی کتابوں کے مصنف بھی تھے۔