عراق کے مفرور نائب صدر قطر پہنچ گئے

بغداد(بى بى سى) اطلاعات کے مطابق عراق کے مفرور نائب صدر طارق الہاشمی ملک چھوڑ کر قطر پہنچ گئے ہیں۔
عراق کے نائب صدر طارق الہاشمی کے دفتر اور قطر کے سرکاری خبر رساں ادارے کے مطابق عراق کے کرد علاقوں میں چند ماہ پناہ لینے کے بعد وہ قطر پہنچ گئے ہیں۔
گزشتہ سال نائب صدر نے اس وقت کرد علاقوں میں پناہ حاصل کی تھی جب ان کی گرفتاری کے وارنٹ جاری کیے گئے تھے۔
عراق کے نائب صدر طارق الہاشمی پر الزام ہے کہ انہوں نے قتل و غارت کرنے والے گروہوں کو منظم کیا تھا۔
وہ عراق میں سنی مسلک کے سب سے طاقت وار سیاست دان مانے جاتے ہیں اور شعیہ مسلک سے تعلق رکھنے والے ملک کے وزیراعظم نورالمالکی کی جانب سے ان کے خلاف عائد کیے جانے والے الزامات کے بعد ملک میں فرقہ وارانہ کشیدگی میں اضافے کے خدشات پائے جاتے تھے۔