یمن‘القاعدہ جنگجووں نے صنعاکے قریب رداشہرپرقبضہ کرلیا

صنعا (این این آئی) القاعدہ نے یمن کے قصبے ردا پر قبضہ کرلیا۔غیرملکی خبررساں ادارے کے مطابق القاعدہ کے جنگجووںنے دارالحکومت صنعا سے 170 کلومیٹر دور صوبہ البیضا کے قصبے ردا پر قبضہ کرلیا ہے۔
جنگجووں نے قصبے پر چاروں طرف سے حملہ کیا اور مقامی پولیس کی معمولی مزاحمت کے بعد علاقے پر قابض ہوگئے۔ردا کی آبادی 60ہزار نفوس پر مشتمل ہے۔
یمن کی سوشلسٹ پارٹی کے رہنما ابو یحییٰ نے کہا ہے کہ سیکورٹی فورسز نے ردا کو القاعدہ سے بچانے کے لیے مناسب اقدامات نہیں کیے۔
ان کا کہنا ہے کہ جنگجووں کا اگلا ہدف اب مارب ہوگا جس پر قبضے کی صورت میں وہ دارالحکومت صنعا کے مزید قریب پہنچ جائیں گے۔صوبہ ابیان میں بھی متعدد قصبے القاعدہ کے کنٹرول میں آچکے ہیں۔