مذہبی جماعتوں کا اتحاد وقت کی ضرورت ہے

کوئٹہ(ايجنسياں) جمعیت علماء اسلام کے سربراہ ورکن قومی اسمبلی مولانا فضل الرحمن نے مذہبی جماعتوں کے اتحاد کو وقت کی اہم ضرورت قرار دیتے ہوئے کہا کہ کوئٹہ میں قونصل خانہ کے قیام کی امریکی کوششوں کا مقصد بلوچستان میں خون ریزی کا نیا کھیل کھیلنا ہے جس میں بعض جماعتوں کی اسے حمایت حاصل ہے، افغانستان میں شکست کا ملبہ پاکستان پر گرانے کی کوششیں کی جارہی ہیں اس لئے مذہبی جماعتوں کو اتحاد ویکجہتی کا بھرپور مظاہرہ کرتے ہوئے امریکہ کے خونی عزائم کو ناکام بنانا ہوگا۔
ان خیالات کا اظہار انہوں نے بدھ کو کوئٹہ پہنچنے کے بعد بلوچستان اسمبلی میں جمعیت علماء اسلام کے پارلیمانی لیڈر اور سینئر صوبائی وزیر مولاناعبدالواسع کی رہائشگاہ پر منعقد ہونے والے اعلی سطحی اجلاس سے خطاب کے دوران کیا۔
مولانا فضل الرحمن نے امریکہ کو کڑی تنقید کا نشانہ بناتے ہوئے کہا کہ افغانستان میں شکست سے دو چار ہونے کے بعد امریکہ اپنی شکست کا ملبہ پاکستان پر گرانے کے درپے ہے اور بلوچستان کے دارلحکومت کوئٹہ میں قونصل خانے کے قیام کیلئے جس طرح پر تول رہا ہے درحقیقت وہ یہاں بلوچستان میں اپنی بعض حواری جماعتوں کے ساتھ مل کر خونریزی کا کھیل کھیلنا چاہتا ہے ، بلوچستان میں بدامنی پیدا کرنے کیلئے امریکہ اور بعض مقامی جماعتوں کا گٹھ جوڑ ہے جو فاٹا اور وزیرستان جیسے حالات پیدا کرکے بلوچستان میں بھی آپریشن کیلئے راہ ہموار کرنے کی پالیسیوں پر گامزن ہیں، ایسے حالات میں مذہبی جماعتوں کا اتحاد وقت کی اہم ضرورت ہے کیونکہ صرف مذہبی جماعتیں ہی اتحاد و یکجہتی کا مظاہرہ کرکے امریکہ کا راستہ روک سکتی ہیں ۔