ممتاز قادری کی سزائے موت پر عملدر آمد معطل

اسلام آباد(خبرايجنسياں) اسلام آباد ہائیکورٹ نے گورنر پنجاب سلمان تاثیر قتل کیس میں سزائے موت پانے والے ممتاز قادری کی اپیل سماعت کے لیے منظور کرتے ہوئے ان کی سزائے موت پر عمل درآ مد روک دیا ہے۔
میڈیا رپورٹس کے مطابق اسلام آباد ہائیکورٹ کے چیف جسٹس کی سربراہی میں دو رکنی بینچ نے درخواست کی سماعت کی اور اس پر وفاق سے جواب طلب کرتے ہوئے مقدمے کے فیصلے تک ممتاز قادری کی سزا پر عملدر آمد روک دیا ہے۔ ممتاز قادری کی طرف سے لاہور ہائیکورٹ کے سابق چیف جسٹس خواجہ شریف پیش ہوئے۔
واضح رہے کہ ممتاز قادری کو انسداد دہشتگردی کی خصوصی عدالت نے گورنر پنجاب سلمان تاثیر کے قتل کے جرم میں دو مرتبہ سزائے موت سنائی تھی جس کے خلاف ممتاز قادری نے اسلام آباد ہائیکورٹ میں اپیل کی جو سماعت کے لیے منظور کر لی گئی۔
ممتاز قادری کے وکیل جسٹس ریٹائرڈ خواجہ شریف کا کہنا ہے کہ مجرم کی سزا پر عمل درآمد روک دیا گیا ہے اور وفاق کو نوٹس جاری کر دیا گیا ہے۔
یاد رہے پنجاب پولیس کی انتہائی تربیت یافتہ ’ایلیٹ فورس‘ میں شامل ممتاز قادری مقتول گورنر کے حفاظتی دستے میں شامل تھا اور اس نے چار جنوری کو سلمان تاثیر کو اس وقت گولیاں کر ہلاک کر دیا تھا جب وہ اسلام آباد میں ایک ریسٹورنٹ سے کھانا کھانے کے بعد گھر واپس جانے کے لیے اپنی گاڑی میں سوار ہو رہے تھے۔