بن لادن کی پناہ گاہ تک جانے پر ’پابندی‘

اسلام آباد(ایجنسیاں) امریکہ میں 9/11 حملوں کے 10 برس مکمل ہونے سے چند روز قبل پاکستان میں حکام غیر ملکی صحافیوں اور دیگر افراد کو القاعدہ کے رہنما اسامہ بن لادن کی پناہ گاہ کے قریب جانے سے روک رہے ہیں۔
اطلاعات کے مطابق ایبٹ آباد کے علاقے بلال ٹاؤن میں واقع قلعہ نما مکان کی طرف جانے والے کئی افراد کو مقامی پولیس نے رواں ہفتے کچھ وقت کے لیے اپنی تحویل میں رکھا۔
ان افراد میں ڈینمارک کے ایک سفارت کار اور دو فرانسیسی صحافی بھی شامل تھے جنھیں بعد میں اسلام آباد واپس جانے کی اجارت دے دی گئی۔
یہ امر قابل ذکر ہے کہ ایبٹ آباد کے سفر پر پابندی کے بارے میں خبر رساں اداروں کو باضابطہ طور پر مطلع نہیں کیا گیا ہے۔
ایبٹ آباد میں دو مئی کو امریکی کمانڈوز کی خفیہ کارروائی کے بعد سے پاکستان میں غیر ملکیوں کی کڑی نگرانی کی جا رہی ہے، کیوں کہ مقامی سراغ رساں اداروں کو خبر ہوئے بغیر امریکی انٹیلی جنس ایجنسی سی آئی اے کا بن لادن کو ڈھونڈ نکالنا اسلام آباد کے لیے شرمندگی کا باعث بنا۔