کابل(اے پی پی/ایجنسیاں)افغانستان کے مختلف صوبوں میں طالبان کے حملوں میں 17 سے زائد اتحادی فوجی ہلاک جبکہ نیٹو فورسز سے جھڑپوں کے نتیجے میں7 جنگجوؤں سمیت 13افراد مارے گئے۔ صوبائی کونسل کے رکن نجیب اللہ کے مطابق بمباری کے باعث متعدد مکانات بھی تباہ ہوئے۔
طالبان ترجمان ذبیح اللہ مجاہد کے مطابق صوبہ لغمان میں چھاپہ مارنے والے امریکی فوجوں کو دومجاہدین کی شدید مزاحمت کا سامنا ہوا، لڑائی میں سات امریکی فوجی ہلاک جبکہ 2مجاہد شہادت سے ہمکنار ہوئے۔
دریں اثنا صوبہ کاپیسا ضلع آلہ سائی میں شدید لڑائی لڑی گئی۔ صوبائی حکام نے کہا ہے اس جھڑپ میں سات طالبان مارے گئے جبکہ بمباری سے چھ عام شہری بھی جاں بحق ہوگئے۔ طالبان نے بیان جاری کرتے ہوئے کہا ہے: “کاپیسا میں سنیچر کی شام تک جاری رہنےوالی شدیدلڑائی کےدوران 7فرانسیسی فوجی ہلاک جبکہ 9 زخمی ہوئے۔ جبکہ دشمن کی جوابی فائرنگ کےنتیجے میں 3 مجاہدین شہید اور 4 زخمی ہوئے۔”
طالبان ترجمانوں نے دیگر متعدد کارروائیوں میں 1 فرانسیسی فوجی سمیت متعدد نیٹو و افغان فوجوں کی ہلاکت کا دعوی بھی کیا ہے۔ایساف نے بیان جاری کرتے ہوئے 3 فوجیوں کی ہلاکت کی تصدیق کی ہے۔