قاہرہ (خبرایجنسیاں) مصر میں پارلیمانی انتخابات کا دوسرا مرحلہ اتوار کے روز منعقد ہو رہا ہے۔ حزب اختلاف کی جماعتوں اخوان المسلمون اور الوفد نے پہلے مرحلے میں ناکامی اور حکومتی جماعت نیشنل ڈیموکریٹک پارٹی کی شاندار کامیابی کے بعد دوسرے مرحلے کے بائیکاٹ کا اعلان کر رکھا ہے۔
دوسرے مرحلے میں ملک کے 166 اضلاع میں پارلیمنٹ کی 283 نشتوں کے لئے ووٹنگ ہو گی۔ دوسرے مرحلے کی نگرانی کے لئے 1494 ججوں اور سول سوسائٹی کے چھے ہزار ارکان پر مشتمل عملہ خدمات سرانجام دے رہا ہے۔ انتخابات کی کوریج کے لئے 490 غیر ملکی صحافی مصر آئے ہیں۔ اس میں حکومتی جماعت این ڈی پی کے 386، سوسائٹی پارٹی کے چھے، اسلام اور جمہوری پارٹیوں کے ایک ایک جبکہ 163 آزاد امیدوار شرکت کر رہے ہیں۔
گذشتہ بدھ کو مرکزی الیکشن کیمشن نے پارلیمانی انتخاب کے پہلے مرحلے کے نتائج کا اعلان کیا تھا جس کے مطابق این ڈی پی نے 209، آزاد امیدواروں نے 7 اور حزب مخالف نے پانچ نشتوں پر کامیابی حاصل کی۔
جمعہ کے روز انتخابی مہم چلانے کے لئے دی گئی مہلت ختم ہو گئی تھی۔ مصری وزیر اطلاعات انس الفقی نے مہلت ختم ہونے کے بعد کسی قسم کی تشہیری مہم کو قانون کی خلاف ورزی قرار دیا ہے۔
الیکشن کمشنر کے مشیر عبد العزیز معر نے مصر کے اہل ووٹروں پر زور دیا ہے کہ وہ انتخابات میں اپنا ووٹ دستوری فریضہ سمجھ کر ڈالیں تاکہ اس کے نتائج عوام کے حقیقی مینڈیٹ کی ترجمانی کر سکیں۔