زانتکار، ٹک ءُ دۆدمانی ءُ چاگردی جهدکارانی ترندێں اێراد یکے شه سیستانءُبلوچستان ءِ کارمسترانی بدگوشیانی باروا

سنی‌آنلاین| پد شه اێشی که یکے شه سیستان ءُ بلوچستان ءِ کارمستراں گۆں وتی رڈێں هبراں واجه شیخ‌الاسلام ءِ باروا، هلاکه ءِ مردمانی دلاں ءُ مارشتانی ٹپی کرت، دینی وانگجاهانی سرمستراں، وڑوڑێں ٹکاں، مزن‌سسا ءُ سیاسی، دۆدمانی ءُ چاگردی جهدکاراں ماں جتاجتائێں جارانکاں آئی گپاں سک اێر جت ءُ وتی پله‌مرزی ءَ شه واجه شیخ‌الاسلام ءَ ءُ آئی دلسۆچی ئێں دیدانکاں جار جت.

📌 په سنی‌آنلاین ءِ سرهال ءَ ماں جارانکاں که اے باروا شنگ بوتگ انت، «واجه شیخ‌الاسلام ءِ هاسێں چاگردی ءُ مردمی جاگه شیعه ءُ سنیانی میانجین ءَ» ءُ همےرنگ واجه ءِ بےجۆڑهێں کرد په یکۆیی ءُ تپاک ءِ پهازگ ءَ هاسکار پد شه زاهدان ءِ هونێں آدێنگ ءِ پێشامد ءَ که مردمانی په اۆپار ءَ سۆگه ئی کرتگ، اشاره بوتگ.

📌 اے جارانکانی رد ءَ بددپێں کارمستر ءَ پرێشا اے بنڈ ءُ بدگوشیاں واجه شیخ‌الاسلام ءِ بابت ءَ درشان کرتگ که گۆں اے رپک ءَ شه وتی اگده ءِ چێر ءَ در بروت. همےرنگ جارانکاں آئی گپاں گۆں امنیت ءَ چپ زانتگ که په دشمنانی سۆب ءَ انت. پمێشا آواں په دێمداری شه چۆشێں کرداں کڈن کرتگ که گۆں چۆشێں مردماں په ترندی دێم په دێمی بیت.

📌 بازێنے شه سیستان ءُ بلوچستان ءِ زانتکاراں ءُ ٹکاں گۆں وتی پهریک ءُ بێزاری ءِ درشان ءَ شه آئی هبراں ءُ آئی سیاهێں گوست ءَ که شه چۆشێں بنڈاں ءُ جێڑهانی جۆڑ کنگ ءَ سرێچ انت، آئی زوتێں گستائی ءِ لۆٹۆک بوتگ انت.