ایران ءِ استمان ءِ مڈیاں نبائد دگه جاهاں هرچ کنگ به انت

شیخ‌الاسلام مولانا عبدالحمید ماں زاهدان ءِ نماز جمعه ءِ دیوان ءَ (۷ آذر ۱۴۰۴) په عدالت، مردمانی هزمت کنگ، پهریز شه ترۆندی ءُ همےرنگ آزاتی ءُ مردمانی مشکلانی رندگیری ءَ کڈن کرت ءُ ڈاه ء دات که نبائد ملک ءِ مڈیاں شه ملک ءَ ڈن ءَ هرچ کنگ به انت.

🔹حکومتداری ءِ ارزشت ءُ مردمانی جاگه ماں حاکمانی گچێن کنگ ءَ

په سنی‌آنلاین ءِ سرهال ءَ شیخ‌الاسلام مولانا عبدالحمید وتی هبرانی اولی سر ءَ کڈن کرت: حکومتداری ءُ اے چیز که حاکمانی گچێن کنگ مردمانی دست ءَ انت، ءُ کارمستری ءُ سیاست ءِ زانت شه الله پاک ءِ داداں انت که بازێنے شه دگه مخلوقاں دیگ نه بوتگ انت ءُ اێشی سوب هم همێش انت که بنی‌آدم بتوانت وتی دنیا ءِ زند ءَ گۆں سازوکار ءَ ردءُبند کنت، تاں هم زندگی راحت بیت ءُ هم بتوانت الله ءَ په جوانی عبادت کنت.

واجه ءَ گێش کرت: الله پاک ءَ مردماں آزاتی داتگ تاں په‌جوانی په وتی زندگی ءَ توجیل درگێج ایت ءُ انچێں مردم کار گرگ به انت که په مردمانی زندمان ءِ آسودگی ءَ کۆشست کن انت تاں هم امنیت جۆڑ بیت ءُ هم مردمانی رۆزیگ ءُ مالزانشت گهتر بیت ءُ چاگرد دێمرئی کنت ءُ زانت ءُ علم شاهگان بیت.

🔹الله ءِ لۆٹ شه حکومتاں مردمانی هزمت کنگ ءُ چاگرد ءِ هزگاری انت

مولانا عبدالحمید درائێنت: آ چیزے که الله پاک شه حکومتاں ءُ کارمستراں پسند کنت همێش انت که په مردمانی آسودگی ءُ هزگاری ءَ کۆشست کن انت ءُ آوانی هزمت ءِ پگر ءَ به انت.

واجه ءَ گۆں اشاره به عدالت ءِ برزێں جاگه ءَ ماں کارمستری ءَ گوشت: هچ عابد ءُ زاهد ءُ ملنگے عادلێں حاکم ءُ کارمستر ءِ کساس ءَ الله ءِ دێم ءَ مز نه دار ایت. عادلێں حاکمے که پهکێں مردم شه راج ءُ مذهب ءُ مسلمان ءُ نامسلماناں برابر ءَ چار ایت ءُ مچاں گۆں عدالت ءَ هزمت کنت. اے الله ءِ دێم ءَ برزترێں جاگه ءَ دار ایت.

🔹شرگداری شه نابرابریاں ءُ ایران ءِ مردمانی مشکلانی رندگیری کنگ ءِ زلورت

واجه ءَ کڈن کرت: عدالت الله پاک ءِ دێم ءَ ٹوهترێں ءُ گهترێں عبادت انت. کهنێں گپےکه چراگےکه په گس ءَ روا انت، په مسیت ءَ حرام انت. ماں اے جاور ءَ که ایران ءِ مردماں مشکلانی آماچ انت نه بائد مڈیاں دگه جاهاں هرچ کنگ به انت. ایران ءِ استمان وازمندگ انت ءُ مشکل دار ایت، بائد انت مشکلان اش رندگیری به انت.

🔹بنی آزاتیانی ارزشت ءُ پهریز شه ترۆندی ءَ

مولانا عبدالحمید ءِ گپانی رد ءَ عدالت ءُ آمید ءُ بنی آزاتیانی اێر دارگ ءُ همےرنگ پهریز شه ترۆندی ءَ سک هژدری انت، پچےکه ترۆندی ءِ آسر ترۆندی انت ءُ هرجا هم ترۆندی جواب نه دنت، بلکه ترانکاری ءُ تعامل جواب دنت.