اسلام ءِ احکاماں نه بائد په سیاست ءُ حکومت ءِ ساتگ ءَ ندر به انت

شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (30 آبان 1404/ 21 نومبر 2025) اے دیدانک ءَ که اسلام ءِ احکاماں په حکومت ءِ ساتگ ءَ کارمرز به انت «پکا رد» زانت که گۆں دین ءَ چپ انت ءُ ٹکاٹک گوشت ئی: سیاست یک بهرے شه اسلام ءِ دین ءَ انت ءُ اسلام ءِ احکاماں نه بائد په سیاست ءُ حکومت ءِ ساتگ ءَ ندر به انت.

🔹دین ءِ کارمرز کنگ په حکومت ءِ برجاه دارگ ءَ شه دین ءَ چپ ءُ یک کمُکێنے ءِ دیدانک انت

په سنی‌آنلاین ءِ سرهال ءَ مولانا عبدالحمید گوشت: همے زوتاں یکے شه پارلمان ءِ جُلی ئێں جهگیراں یک گپے جت ات که «اسلامی حکومت» بندار انت ءُ مچێں احکاماں فروعات ءُ «اوزار» انت ءُ اگاں حکومت صلاح زانت توانت که دینی احکامانَ چۆ نماز، رۆچگ ءُ حج ءَ په حکومت ءِ ساتگ ءِ واستا بند کنت.

زاهدان ءِ آدێنگ ءِ امام ءَ اے گپانی پسو ءَ ٹکاٹک گوشت: اے که دین ءَ اوزارے په حکومت ءِ ساتگ ءَ کن ات سک ردێں دیدانکے که شه دین ءَ چپ انت ءُ یک کمکێں پاٹے ءِ دیدانک انت. بندار «دین» انت ءُ «سیاست» چۆ نماز ءُ رۆچگ ءُ زکات ءُ… یک بهرے شه دین ءَ انت. پمێشا نه بائد ماں پارلمان ءَ چۆشێں گپے جنگ بیت.

🔹«دین» هچ حکومتے ءِ اوزار نه انت؛ نه بائد شه «دین» ءَ په حکومت ءِ ساتگ ءَ ردکارمرز بیت

زاهدان ءِ آدێنگ ءِ امام ءَ گێش کرت: اے که اسلام ءِ احکامانَ اوزارے په حکومت ءِ ساتگ ءَ زان اێں، گڑا اے هما چیزے که مئے کارمسترانی سر ءَ اے باروا اێراد گرگ بیت. نه بائد هچ کسے په وتی جاگه ءِ ساتگ ءَ دین ءَ ردکارمرز کنت. دین هچ حکومت ءُ سرکارے ءِ اوزار نه انت، توری که حکومت ءُ سرکار «اسلامی» بیت.

واجه ءَ کڈن کرت: دین ءِ ردکارمرز کنگ په حکومت ءِ ساتگ ءَ گۆں عقل ءُ راستبندگری ءُ شرعی نص ءُ نقلاں چپ انت. مزن‌شأنێں قرآن ءَ درائێنتگ: «الَّذِينَ إِنْ مَكَّنَّاهُمْ فِي الْأَرْضِ أَقَامُوا الصَّلَاةَ وَآتَوُا الزَّكَاةَ وَأَمَرُوا بِالْمَعْرُوفِ وَنَهَوْا عَنِ الْمُنْكَرِ وَلِلَّهِ عَاقِبَةُ الْأُمُورِ» [حج: 41] ماں اے پاگپ ءَ حاکم ءُ راج‌دربراں گوشگ بوتگ انت که اگاں ما آوان حکومت به دےاێں گڑا آوان نماز ءَ برجاه دار انت ءُ زکات دےانت ءُ نیکی ءِ حکم ءَ دےانت ءُ مردماں دور دار انت شه بدێں کاراں.

مولانا عبدالحمید درائێنت: نماز ءُ زکات ءُ نیکی ءِ حکم ءَ دیگ ءُ شه بدێں کاراں مکن کنگ په حکومت ءِ ساتگ ءَ اوزار نه انت؛ بلکه چوناهی ءَ سیاست په اسلامی احکامانی اێر دارگ ءَ کارمرز بیت.

واجه ءَ گێش کرت: الله پاک ءَ ماں دگه پاگپاں قرآن ءِ ته ءَ حاکماں سۆگه کرتگ که عدالت ءُ آمید ءَ اێر دار انت. «يَا دَاوُودُ إِنَّا جَعَلْنَاكَ خَلِيفَةً فِي الْأَرْضِ فَاحْكُمْ بَيْنَ النَّاسِ بِالْحَقِّ» [ص: 26] یکے شه خلافت ئی الهی ءِ هژدری ئێں مولءُمراداں عدالت ءِ اێر دارگ انت ماں ڈگار ءِ سر ءَ، عدالت اوزارے نه انت په حکومت ءِ ساتگ ءُ پهازگ ءَ، بلکه حکومت اوزارے په عدالت ءِ اێر دارگ ءَ. اگاں خلافت ءُ حکومت بیت، بلے عدالت مه بیت گڑا اے خلافت، خلافتے نه انت.

🔹ماں اسلام ءَ سیاست ءِ بندار راستی ءُ عدالت انت/ هچ حاکمے نه توانت الله ءِ احکاماں دستکاری کنت

زاهدان ءِ آدێنگ ءِ امام ءَ تی هبرانی دێمتر ءَ اسلامی سیاست ءِ لهتے مهمێں خاصیتاں درشان کرت ءُ گوشت ئی: راستێں سیاست ءَ اسلامَ منّ ایت ءُ ابید شه آئی گۆں اسلام ءَ چپ انت.

واجه ءَ گێش کرت: ماں اسلامی سیاست ءَ ابید شه راستی ءُ عدالت ءِ اێر دارگ ءَ دگه چیز منّگ نه بیت. ماں اسلام ءَ بائد انت که سیاست الله ءِ حکمانی رد ءَ بیت. هچ حاکم ءُ هچ پاٹی ئے نه توانت الله ءِ احکام ءُ حلال ءُ حراماں نادلگۆش کنت یا آوان دستکاری کنت.

🔹شه اسلامی سیاست ءِ مهمێں بنداراں مردمانی هزمت کنگ انت/ عدالت ءِ اێر دارگ مردمانی وشنودی ءُ حکومت ءِ پهازگ ءِ سوبَ بیت

مولانا عبدالحمید درشان کرت: یکے شه اسلامی سیاست ءِ مهمێں بنداراں مردمانی هزمت کنگ انت؛ سیاستے که په مردمانی هزمت ءَ بیت اسلامی دین ءَ هم زۆراک کنت. بلے اے که اسلامی احکاماں په سیاست ءَ ندر به انت چۆشێں سیاستے هچ ماں اسلام ءَ نه انت.

واجه ءَ گێش کرت: حکومت تاں وهدے جوان انت که آئی ته ءَ عدالت ءُ احکاماں راست اێر دارگ به انت. عدالت ءِ اێر دارگ سوب بیت تاں مردم وشنود به انت ءُ همےرنگ حکومت ءِ پهازگ ءِ سوب بیت.