اگاں جنگ کن ئے گڑا کوہ ءَ برو اود ءَ نشتگیں ورنا تئی پسو ءَ دے اَنت

ھزدار:  چہ بلوچستان نیشنل پارٹی ءِ  سروک  سردار اکتر مینگل ءِ سروکی  ءَ یک روانکے  چه وڈ ءَ درکپتگ ءُ دیم پہ شال ءَ شتگ.

ھمے میان ءَ چه پاکستانی ریاست ءِ نیمگ ءَ په دراجیں روانک ءِ دارگ ءَ راھانی سر ءَ چوکی جنگ بیتگ ءُ کنٹینر ایر کنگ بیتگ، ھمے وڑ ءَ ھزدار ءَ ھوار بلوچستان ءِ بازیں دمگاں دامگ بند کنگ بیتگ. چه ایشی ءَ اَبید روانک سردار اکتر مینگل ءِ سروکی ءَ مرچی ھزدار ءِ شھر ءَ سر بیتگ.

بی این پی ءِ سروک سردار اکتر مینگل ءَ تران کرتگ ءُ گوشتگ که مرچی مئے درآھگ ءِ مول چه ھچ کس ءَ چیر نه اِنت، ریاست، ریاستی کارمند، اداره وزیر ءُ وتگڑیں سرکار ءَ  یک وھدے مئے ورناھانی چست کنگ بندات کرتگ اَت، من توار چست کرت ءُ بازیں گلانی در ٹک اِت که بیا اِت تپاک به اِیں ءُ ایشانی دیم ءَ اوشت اِیں که یک روچے ایشانی دست داں مئے جنینانی گشان ءَ سر مه بیت.

آئی ءَ گوشتگ که مئے ورنا پھریز  نه اَنت،  مئے کماشانی پاگ ھمے دگانی سر ءَ دور دیگ بیتگ اَنت، بلے ما وتی چم بستگ اَنت. مرچی ماه رنگ ، سمی دین مھمد اِیوک ءَ  جنین  نه اَنت بلکیں بلوچستان ءِ شرپ اَنت، آ ایوک ءَ یک ھندے ءِ جھمنند نه اَنت بلکیں سرجمیں بلوچستان ءِ زھگ اَنت.

اکتر مینگل ءَ گوشتگ ریاست گوں جنین ءُ زھگانی دزگیر کنگ ءَ ناشرکاری ءِ ھلاس کنگ ءِ ٹاپار ءَ جنگ اِنت. تو اگاں جنگ کن ئے گڑا کوھاں برو جنگ کن ، مردیں زھگ ، بلوچ ءِ ورنا اود ءَ نشتگ اَنت ، بلے اود ءَ شما شت نه کن اِت چی ءَ که شمئے جنین شمارا اود ءِ روگ ءِ موکل ءَ نه دے اَنت. اود ءَ شما وتی شلواراں تر کن اِت. شما وتی زور ءَ بس په  جنین ءُ زھگاں کارمرز کن اِت، بلوچستان ءِ ورنا کوھاں نشتگ اَنت ءُ شمئے پسّو ءَ دات کن اَنت.

آئی ءَ گوشتگ مارا ایمینیں زھرشانی ءِ موکل دیگ نه بیت، مارا په وتی شھیدان دو ارس ریچگ ءِ موکل نیست. مئے شرپ پادمال کنگ بوگ ءَ اِنت تئی ریاست ءَ په مئے درداں چونیں درمان ھست.

بنشۆن: زرمبش بلوچی (آدینگ، 28 مارچ 2025)