مکران ءِ تیابدپ ءِ دێمروی « مانۆک ءُ گواچنی» نه انت؛ پچےکه مردمانَ آیی ته ءَ هچ کردے نێست

سنی‌آنلاین| معین‌الدین سعیدی، چهبار ءِ پێسر ءِ جهگیر ءَ مکران ءِ تیابدپ ءِ دێمروی ءِ رهبند ءُ طرح ءَ را «یک نێمگی» زانت ءُ گوشتء: ڈیه ءِ مردماں هم بائد انت ماں آئی هوار به انت.

په سنی‌آنلاین ءِ سرهال ءَ معین‌الدین سعیدی، سے‌شمبی (30 بهمن 1403/ 18 فبروری 2025) زرآباد ءِ هند، سورو ءِ دینی وانگجاه ءِ طالبانی زانت‌دربری ءِ مراگش ءَ گوشت: هچ کس نه انت که وتی ملک ءُ ڈیه ءِ دێمروی ءَ مه لۆٹ ایت. ما پهکانی واهشت انت که مئے ملک ءُ ڈیهاں دێمروی کن انت ءُ ملک ءِ ته ءَ ءُ درملک ءَ اثر داشته بیت.

سعیدی گوشت: بلێں دێمروی ءِ که تاں نون ماں مکران ءِ تیابدپ ءَ بوتگ، «مانۆک ءُ گواچنی ئێں دێمروی» ئے نه بوتگ، بلکه «یک نێمگی ئێں دێمروی» ئے بوتگ، پچےکه ڈیه ءِ مردماں ماں اے دێمروی ءَ هوار نه بوتگ انت.

چهبار ءِ پێسر ءِ جهگیر ءَ ٹکاٹک گوشت: دێمروی ءِ که ڈیه ءِ مردماں آئی ته ءَ هوار مه بنت، هچ سالمێں عقلے آیرا نه منّ ایت؛ چیزے که ملک ءِ کارمستراں هم اێشر ءَ سرپد بوتگ انت ءُ مئے مزن‌سسائاں هم آیرا لۆٹ انت.

معین‌الدین سعیدی وتی هبرانی دێمتر ءَ دمگی کارمسترانی کارگرگ ءَ ماں سیستانءُبلوچستان ءِ استانداری/ گورنری ءُ چهبار ءِ آزاتێں ڈیه ءِ سرمستری ءَ «مبارکێں گامگێجے» زانت ءُ امێتوار بوت که اے دمگی کارمستراں شه اے جاگه ءَ په مردمانی حقانی پیلو کنگ ءَ کارمرز کن انت.