تیوگێں استمان ءُ سرکاراں بائد انت وتی پرۆش ءُ بےسۆبیانی سوَبان ءَ پٹءُپۆل کن انت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (7 دی‌ 1403) ایران ءُ دگه ملکانی مشکل ءُ پێشامدانَ «آسر» زانت ءُ په اے مشکلانی «پٹءُپۆل» ءُ «مقابله گۆں سوباں» سک سۆگهء کرت.

په سنی‌آنلاین ءِ سرهال ءَ مولانا عبدالحمید درشان کرت: راجدپتر ءِ دراجی ءَ اے چیز داب بوتگ که استماناں مدام وتی پرۆش ءُ بےسۆبیانی سوبانَ پٹءُپۆل کرتگ وتی پرۆشانَ دگرانی گٹ ءَ نه پرێنتگ اش.

واجه ءَ گێش کرت: ماں اسلام ءِ اول ءَ وهدےکه صحابه ئاں ماں غزوه احد ءَ پرۆش وارت ءُ وتی پرۆش ءِ سوباں جست اش کرت، پاکێں قرآن ءَ مسلمانانی پرۆش ءِ سوباں پٹءُپۆل کرت ءُ درائێنتء: «أَوَلَمَّا أَصَابَتْكُمْ مُصِيبَةٌ قَدْ أَصَبْتُمْ مِثْلَيْهَا قُلْتُمْ أَنَّى هَذَا قُلْ هُوَ مِنْ عِنْدِ أَنْفُسِكُمْ» [آل عمران: 165] اے پرۆش ءِ سوب، یک پاٹی ئے شه صحابه ئانی جند ءِ کردار ات که واجه رسول الله صلی‌الله‌علیه‌وسلم  ءِ پرمان ءِ رد ءَ کردار اش نه کرت، که واجه ءَ گوشت ات که هچبر آ مهمێں کوه ءَ ویل مه کن انت، پچےکه بیت کنت دشمن شه پشت ءَ بێڑ کنت.

زاهدان ءِ آدێنگ ءِ امام ءَ ٹکاٹک گوشت: دنیا ءِ مرۆچی ئێں تیوگێں پێشامداں «آسر» انت ءُ دنیا بائد انت اے پێشامدانی «سوب» ءَ پٹءُپۆل کنت. تیوگێں دنیا ءِ سرکار ءُ برجمیاں بائد انت جێڑه ءُ پرۆشانی سوبانَ پٹءُپۆل کن انت.

🔹ملک «بےمٹ ءُ سکێں مالزانشتی گپچل» ءِ آماچ انت؛ اے بن‌گپ بائد انت «پٹءُپۆل» بیت

مولانا عبدالحمید گوشت: ملک ءِ ته ءِ مشکل ءُ جێڑهاں هم بائد انت پٹءُپۆل به انت. نون ملک ءِ مالزانشت یله دیگ بوتگ ءُ ملک، سکێں مالزانشتی گپچل ءِ آماچ انت ءُ اے مشکل ءِ واگ شه دست ءَ در انت. چۆشێں مالزانشتی مشکل، ملک ءِ راجدپتر ءِ ته ءَ بےمٹ انت ءُ مردمانَ بازێں سکیانی آماچء کرتگ. بائد انت چۆشێں مشکلاں پٹءُپۆل به انت ءُ آوانی سوب ودی کنگ به انت.

واجه ءَ گێش کرت: سوریه ءُ دنیا ءِ آدگه جاهانی پێشامد ءُ مسائلاں هم پٹءُپۆل به انت. اگاں اے مسائلاں بےدۆزواهی ءَ پٹءُپۆل مه به انت، گڑا آیۆک ءَ گۆں گێشترێں مشکلاں آماچَ به اێں.

🔹فلسطین ءِ استمان وتی مشکلانَ «پٹءُپۆل» کنت

زاهدان ءِ آدێنگ ءِ امام ءَ وتی هبرانی دێمتر ءَ فلسطین ءِ استمان ءَ را هم سک سۆگه کرت که وتی مشکلانَ پٹءُپۆل کن انت ءُ گوشتء: فلسطین ءِ استمان راجدپتر ءِ دراجی ءَ مظلوم بوتگ ءُ شه وتی حقاں زبهر بوتگ. فلسطینیانی جند بائد انت وتی اے مشکلاں پٹءُپۆل کن انت ءُ وتی سستی ءُ کمیانَ هم چشمانک دےانت.

واجه ءَ ٹکاٹک گوشت: ما گۆں دلسۆچی ءُ خیرلۆٹی ءَ حماس ءِ جنز ءَ سۆگهَ کن اێں که غزہ ءَ بوتگێں انوگێں بےمٹێں جیڑہ ءُ زالبول ءُ زھگانی کشتار (همےرنگ 7 اکتوبر ءِ اُرش) ءِ پٹءُپول ءَ به کن انت که چِه چیزے اے پێشامدانی سوب بوتگ انت.

🔹 ظالم بائد شه وتی کار ءِ آسرات ءَ ترس ایت

زاهدان ءِ آدێنگ ءِ امام ءَ وتی هبرانی گڈسر ءَ شه «ظلم» ءِ آسراتاں ڈاه دات ءُ گوشتء: الله پاک ءَ درائێنتگ: «وَلَا تَحْسَبَنَّ ٱللَّهَ غَٰفِلًا عَمَّا يَعْمَلُ ٱلظَّلِمُونَ». اے پاگپ ڈاهے په دنیا ءِ تیوگێں ظالماں. آوان که ظلم کن انت ءُ مردمانی زند ءَ تباه کن انت، گت مه کن انت که کسے نێست که شه آوان جست کنت، بلکه الله پاک صددرصد ظالم ءَ انگڑێن ایت ءُ آیرا سک سزا دنت.

واجه ءَ ٹکاٹک گوشت: ظالم بائد انت شه وتی کار ءِ آسرات ءَ ترس ایت ءُ زانت که ظلم ءَ جوانێں آسراتے نێست. هرکس که ظلم کنت الله پاک آیرا همے دنیا ءَ انگڑێن ایت ءُ سزا دنت. اگاں اسرائیل مرۆچی فلسطین ءِ مظلومێں مردمانی سر ءَ ظلم کنت، گت مه کنت که شه الله ءِ سزا ءَ رک ایت. ما را امێت هست که زۆرگپتگێں ڈگاراں پد ءَ فلسطین ءِ مردمانَ دیگ به انت ءُ فلسطین ءِ مردم وت‌واجه به انت ءُ وت وتی ملک ءِ ته ءَ حکومت کن انت.