یک سسا ءِ پارلمان ءُ سرکار پسۆ نه دنت

شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (۱ تیر ۱۴۰۳) گوشت: پهکان دیست ءُ آزموت که پارلمان ءُ سرکارے که یک سسا ءِ واهند به انت پسۆ نه دنت.

واجه ءَ گێش کرت: لهتے گۆں اے گت ءَ که ماں پارلمان ءَ کمتر جێڑه بیت ءُ پارلمان گۆں سرکار ءُ حکومت ءَ همگرنچ بیت، جهد اش کرت تاں بس شه یک پاٹی ئے جهگیر گچێن کن انت ءُ پارلمان ءُ سرکار ءَ هم‌رنگ کن انت، بلێں کته‌کاری ءَ ماں دنیا ءَ نشان داتک که یک رنگێں پارلمان پسۆ نه دنت.

زاهدان ءِ آدێنگ ءِ امام ءَ گوشت: پارلمانے سۆبێن انت که آیی تها وڑوڑێں سسا ءِ مردم ءُ پاٹی بیت. اسلامی شۆرجاه هما رنگ که شه نامے پدر انت شۆر ءِ ءُ کانود ءِ گچێن کنگ ءِ جاگه انت. وهدےکه گۆں وڑوڑێں پاٹیاں شۆر بیت ءُ آوانی شۆراں دلگۆش به انت، گڑا هما گهترێں شۆر منّگ ءُ گچێنَ بیت که پهکێں مردم، راج، مذهب ءُ سسائانی واهند ءُ جنێں ءُ مردێناں آیرا منّ انت. سرکار هم بائد پهکێں مردمانی جهگیر بیت ءُ سرکار ءِ ٹۆلی که شۆرَ کن انت بائد تیوگێں مردمان ءَ دلگۆش کن انت، پچےکه گهترێں ءُ سۆبمندترێں سرکار هما انت که تیوگێں ملک ءِ جهگیر بیت ءُ مردمانی وشنودی شه چۆشێں سرکارے هم گێشترَ بیت.

🔹 ایران، تیوگێں جنێں ءُ مردێں ءُ راج ءُ مذهب ءُ دینانی ملک انت

واجه ءَ گۆں اشاره به اێشی که ایران متکثرێں ملکے، بزاں اۆد ءَ رنگ‌رنگێں مردم گۆں وڑوڑێں راج ءُ مذهب ءُ دین ءَ هست، گوشتء: ایران تیوگێں جنێں، مردێں، راج، مذهب ءُ دینانی ملک انت ءُ انچێں سرکارے سۆبێنَ بیت که پهکێں راج ءُ مذهبانی جهگیر بیت.

شیخ‌الاسلام مولانا عبدالحمید گوشت: وهدےکه محمد مرسی که اسلام‌گرا ئے ات، ماں مصر ءَ په جمهوری کماشی ءَ گچێں بوت، من ماں نمدے آیرا گوشت که جهد کنت که اسلام ءِ رهبند ءَ که کم‌کم اێر آت ماں مصر ءَ اێر دار ایت ءُ سک مه گیت. من نبشت که پرێشی که تاں نون مصر ءِ تها حکومتاں غربگرا بوتگ انت ءُ مردماں هم آوانی پدگیر بوتگ انت جهد کنت گۆں مردماں آسانی کنت. من سۆگه کرت که شه دیندار ءُ لاییک ءُ وڑوڑێں راج ءُ پاٹیاں کار گیت تاں دشمن ءَ نیمۆنے دست ءَ مه کپ ایت.

🔹 هاسێں مردمانی گچێن کنگ شه ٹوهترێں ردیان ات

واجه ءَ گێش کرت: من مدام جمهوری اسلامی ءِ کارمستران ءَ دلگۆش گور داتگ که شه آوانی ٹوهترێں ردیاں هاسێں مردمانی گچێن کنگ بوتگ. اے دیدانک ءَ را ناشی ءُ ناکته‌کارێں مردماں پێش داشت تاں بس هما مردم کار گرگ به انت که شه هاسێں پاٹی ءِ انت ءُ ایران ءِ گێشتری مردمانی دیدانک ءُ سسا نادلگۆش بیت.

زاهدان ءِ آدێنگ ءِ امام ءَ درشان کرت: منی خێرخواهی ءُ دلسۆچی ئێں سۆگه اێش انت که اسلامی شۆرجاه ءُ نۆکێں سرکار ءِ هم‌رنگ کنگ پسۆ نه دنت. تهنا سرکارے ماں ایران ءَ سۆبێں بیت که جنێں ءُ مردێں ءُ راج ءُ مذهب ءُ حتا آدگه دینانی جهگیر بیت. همےپێم آ پارلمان سۆبێں بیت که تیوگێں پاٹی ءُ سسائانی واهنداں اۆد ءَ جهگیر داشته به انت ءُ الله ءِ رهبند هم په دنیا ءِ راه‌برگ ءَ رنگ‌رنگی ءُ بازی انت. من پێسر ءَ هم گوشتگ که اسلامی شۆرجاه سرکار ءُ حکومت ءِ جهگیر نه انت، بلکه مردمانی جهگیر انت ءُ مردماں بائد په آزاتی جهگیران ءَ گچێن کن انت. جمهوری کماش هم مردمانی جهگیر انت.

🔹 بائد پێسر ءِ رهبندانی باروا نۆکێں چارگے بیت

شیخ‌الاسلام مولانا عبدالحمید گێش کرت: اسلام ءَ په آزاتی ءَ باز سۆگه کرتگ ءُ اسلام ءِ دین هم گۆں الس‌واجهی ءَ نزیک انت. مردم بائد توان انت چۆ بازێں ملکے ءِ مردماں په آزاتی وتی جمهوری کماش ءَ گچێن کن انت. بائد انت پێسر ءِ رهبندانی باروا نۆکێں چارگے بیت ءُ تیوگێں راج ءُ سسائانی واهنداں دلگۆش به انت ءُ استمان ءَ همراه کن اێں ءُ استمان ءِ وشنودی ءَ کٹ اێں.

واجه ءَ گڈسر ءَ سک سۆگه کرت: پێغمبرانی رهبند همے بوتگ که گونڈێں ردیان ءَ باز دلگۆش اش نه کرتگ ءُ هرجا گونڈێں ردی ئے بوتگ آیرا اصلاح اش کرتگ. حکومت ءِ اگده همێش انت که آوان که حکومت ءَ منّ انت ءُ آوان که گۆں حکومت ءَ چپ انت، هردوئانی لۆٹان ءَ ءُ استمان ءِ تاهیر ءَ دلگۆش کنت ءُ گۆں مردماں همراه بیت ءُ گۆں آوان که گۆں حکومت ءَ چپ انت هم شۆر کنت ءُ آوانی توار ءَ گۆش دار ایت. هچ سیاست ءُ سسا ئے گهتر شه اێشی نه انت که الله ءُ مردمانی وشنودی کٹگ بیت.