الله ءِ عرش شه زاهدان ءِ هۆنێن جمعه ءِ شهیدانی ماسانی آه ءُ نالگ ءَ الم ءَ جسک ایت

سنی‌آنلاین| چهبار ءِ مردمانی جهگیر ءَ ماں پارلمان ءِ دوشمبی ءِ دیوان ءَ (23 مرداد 1402) گوشت: «الله ءِ عرش گۆں اے ملک ءِ جنکانی مودانی دیستن ءَ نه جسک ایت، البت گۆں زاهدان ءِ هۆنێن جمعه ءِ شهیدانی ماسانی آه ءُ نالگ ءَ پکا جسک ایت. گۆں هاسێن ناجۆڑانی رنجاں که درپه‌در دوائے پد ءَ گرد انت، گۆں سیستان ءُ بلوچستان ءِ مردمانی تنگی ءَ، گۆں رنجے که معلول ءِ نادراهاں آماچ انت، گۆں دردے که مرادآباد ءُ نوک‌آباد ءُ عثمان‌آباد ءُ کُمب ءُ هوت‌‌آباد ءُ میرآباد ءُ چادران ءِ حاشیه نندێن مردماں هر رۆچ گۆں آیی آماچ انت، گۆں رنجے که تێل‌براں په دپارے نان ءَ کش انت؛ پکا الله ءِ عرشَ جسک ایت.

🔸معین‌الدین سعیدی همےرنگ شه سیستانءُبلوچستان ءِ مشکلان چۆ «استان ءِ مردمانی زبهری شه ورنایی ءُ آباتی ءِ کانود ءَ آوان کارگرگ ءِ باروا»، «جهمنندێن ورنائانی نادلگۆشی ماں استخدامی چکاسان»، «بنیادی کانود ءِ پازدمی بند ءِ کار نگرگ (دمگی زبان ءِ وانێنگ)» ءُ «استان ءِ زرباری مردمانی زبهری شه ورگی ئێں آپ ءَ» انتقاد کرت ءُ شه کارمستران لۆٹ ات ئِے اے مشکلان حل کن انت.