مولانا عبدالحمید ءِ اۆپار ءُ سگگ بےجۆڑه انت/ مولانا عبدالحمید چاگرد ءِ امێت انت

مولانا محمدحسین گرگیج ماں گالیکش ءِ جمعه نماز ءِ دیوان ءَ (5 خرداد 1402/ 26 مے 2023) گوشت: مولانا عبدالحمید ءِ اۆپار ءُ سگگ باز انت. واجه عجیبێن اۆپارے دار ایت. هر رۆچ شه هر نێمگے توارے چست بیت ءُ آ واجه ءَ هبر دےانت ءُ بنڈ بند انت، بلێن مولانا عبدالحمید آ هبر ءُ بنڈان سگ ایت. آ دم ءَ که مهتر یوسف علیه‌السّلام ءِ براساں آیی دێم ءَ سرجهل ءُ دپ‌هٹ بوت انت، مهتر یوسف ءَ گوشت: من ءَ دو چیز ءَ سۆبێن کرت: «تقوا ءُ پلگار» ءُ «اۆپار ءُ سگگ».

گالیکش ءِ دینی وانگجاه ءِ سرمستر ءَ وتی هبرانی دێمتر ءَ شیخ الاسلام مولانا عبدالحمید ءَ را «چاگرد ءِ امێت» زانت ءُ درشان ئِے کرت: من گوش آں که شیخ‌الاسلام مولانا عبدالحمید چاگرد ءِ امێت انت. هرکس وت را گۆں آن واجه ءَ بگیر کنت وت را بنّام ءُ دێم جتَ کنت.

🔸کسے که پاهو دیگ بیت یا تێل کش ءُ بڈبر ءُ سربازے که کشگ بیت پهکان همے ملک ءُ استمان ءِ زهگ انت

مولانا محمدحسین گرگیج ماں دگه بهرے شه وتی هبراں گوشت: برےبرے شه مردمانی کشگاں ما را هال رس ایت. اے وئیلاں په ما مصیبت انت، پچےکه اے پهکان همے ملک ءِ مردم انت. آ تێل کش یا بڈبر یا کسے که پاهو دیگ بیت یا سربازے که کشگ بیت، همے ملک ءُ استمان ءِ زهگ انت.

مولانا گرگیج ٹکاٹک گوشت: نبائد وت‌منی ءُ کێنگ سبب بیت که ما وتی زهگان گۆں وتی دست ءَ کش اێں. یک انسان ءُ یک مومن ءُ مسلمان ءِ ناحقێن هۆنے رێچگ شه الله ءِ گس ءِ ڈالێنگ ءَ بدتر انت. اے کُشءُکُشتاراں په ملک ءَ نقصان ءُ چَٹی دار انت.