هشتاد ءُ نود سالگێن مردماں نه توان انت په ورنائاں تصمیم گر انت

شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (۳۰دی۱۴۰۱/ 20 جنوری 2023)، ملک ءِ بنیادی کانود ءِ ٹگلێنگ ءَ زمانگ ءِ جاورے رد ءَ لۆٹۆک بوت.

په سنی‌آنلاین ءِ سرهال ءَ شیخ‌الاسلام مولانا عبدالحمید اے باروا ٹکاٹک گوشت: اے دۆر،  رسانکدرانی دۆر انت. ماں یک دمے دنیا ءِ تیوگێن هالاں تالان بےانت. پێسر ءَ گوشت اش که دنیا یک هلکے، بلێن نون دنیا یک گسے بوتگ. اد ءَ نپس کش ات، دنیا ءِ آ سر ءَ شمے نپسے توار ءَ اشکن انت. مرۆچی ورنائاں واهگ ءُ امێتداری دار انت. اے نونێن دۆرے جن ءُ زهگ انت، بائد انت که حکومتاں اے جاورانَ چار انت. یک ورنا ءُ زهگ گۆں هشتاد ءُ نود سالگێن پیرمردے یکے نه انت. هشتاد ءُ نود سالگێن مردماں نه توان انت په ورنائاں تصمیم گر انت مگه ورنائانی لۆٹ ءُ امێتداریانَ زان انت.

زاهدان ءِ جمعه ءِ امام ءَ گێش کرت: دنیا ءِ کانوداں هر بیستءُهفت یا بیستءُهشت سال ءَ دوارگ چارگَ بےانت. نۆکێں پدرێچ نۆکێں لۆٹ ءُ وازمندی دار ایت. ارمان كه مئے بنیادی کانود هما چیزے انت که 44 سال پێسر ءَ نزّ آرگ بوتگ. اے کانود بائد زمانگے رد ءَ بدل بیت. سرمستر ءُ پارلمان ءِ جهگیراں اے نۆکێں جاور ءَ دلگۆش کن انت.

🔹په هچ حکومتے وش نه انت که جنێنانَ شه وانگ ءَ مکن کنت

مولانا عبدالحمید درشان کرت: جنێن ءُ مردێن یک جنسے انت ءُ ماں حقاں برابر انت. بائد جنێنانی حق ءُ حرمت ساتگ بیت ءُ حکومتاں جنێنانَ گێشتر دلگۆش کن انت. جنێن ءُ مردێنانی میانجین ءَ ماں وانگ ءَ هچ دگری ءِ نه انت. هردوئان زانشتجاهی ءُ دینی ءُ شرعی زانتانَ کٹ انت ءُ اے باروا آوانی میانجین ءَ هچ دگری ءِ نه انت ءُ برابر انت.

واجه ءَ گێش کرت: حکومتاں په جنێن ءُ مردێناں وانگ ءِ پڑا تیار کن انت. په هچ حکومتے وش نه انت که شه جنێن ءُ مردێنانی وانگ ءَ مکن کنت. اے شه زمانگے واجباتان انت، بائد زمانگے رد ءَ کردار کن اێں ءُ ورنا ءُ جنێن ءُ زهگانَ دلگۆش کن اێں.

🔹آزاتی، برابری ءُ آمید شه استمان ءِ لۆٹان انت

زاهدان ءِ آدێنگ امام ءَ ملک ءِ ورنائانی سزا دیگے باروا گوشت: مئے سۆگه همێش انت که ورنائانی سر ءَ بزّگ بیت ءُ آوانَ گنگ سر ءُ ناامێت مه کن اێں. ورنائانَ بازێن واهگ هست ءُ په وتی زند ءُ آیۆکے واسته ءَ زهرشانیَ کن انت. اے ورنائاں بائد منّێنگ بےانت ءُ لۆٹان اش پوره بےانت. ورنائانَ بندیگ مه کن ات. زهگ ءُ جنێنانی سر ءَ بزّگ کن ات ءُ هبران اش گۆش دار ات، اگاں راست انت منّ ات ءُ اگه رد انت آوانَ منّێن ات، بلێن سزا مه دےات ءُ پاهو مه کن ات. واجه رسول الله صلّی‌الله‌علیه‌وسلّم ءَ آوانی سر ءَ بزّگ کرتگ ءُ آوانی باروا سۆگه ئِے کرتگ. ماں دین اسلام ءُ واجه رسول الله ءِ سیرت ءُ زندمان ءَ نابرابری نێست، ماں آ واجه ءِ سیرت ءَ آمید ءُ برابری هست ءُ همے چیز استمان ءِ لۆٹ انت.

🔹ملک ءِ پدمانی ءِ سبب امنیتی جاور انت

واجه شیخ‌الاسلام ءَ زاهدان ءِ بازێں پٹءُپاسی اۆشت‌جاهانی باروا گوشت: اے رۆچاں مئے شهر ءِ جاور سک امنیتی انت ءُ 7 پٹءُپاسی اۆشت‌جاه 15 دانگ بوتگ انت. تیوگێن مردمانی لۆٹ ءُ باور همێش انت که نبائد شهر ءِ جاور امنیتی بیت. مئے استان ءُ ملک ءِ بنداتی پدمانی ءِ سبب هم همے امنیتی جاور انت. امنیتی جاور دێمروی ءِ هلاپ ءَ انت، هرجا جاور امنیتی بیت اۆدا زرکاری نه بیت ءُ ملک دێمروی نه کنت.