مردمانی لٹءُکٹ ءُ کشک تۆجیل نه انت

سنی‌آنلاین| شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (۲۹ مهر ۱۴۰۱) په زاهدان ءِ پێشامد ءِ کنۆکانی مجازات ءَ سک سۆگه کرت ءُ ملکے پهکێن ذمه‌واران اے باروا میاریگ زانت .

🔹هچ‌کس نه توانت اے اگده ءَ شه وتی بڈ ءَ دۆر دنت

 په سنی‌آنلاین ءِ سرهال ءَ مولانا عبدالحمید اے پێشامد ءَ را بےدرور زانت ءُ گوشت ءِ: پێشامدے که ماں زاهدان ءَ پێش آت باز دلرێشێن پێشامدے ات. چشێن پێشامدے ایرانے تها درور نداشتگ. ما تعجب اێں که پچے ٹوهێن ذمه‌واراں اے باروا بےبرمش انت. دهاں نپر بےمنانک ءَ همے نمازجا ءُ دگ ءِ تها کشگ بوت انت. تیر بازێنے ءِ سر ءُ سێنگ ءَ لگتگ. آوانَ کے ءُ په چه جرمے کشتگ اش؟!

واجه ءَ گوشت: پهکێن ذمه‌واراں ءُ همےپێم مزن‌رهشۆن که تیوگێن سلاهبندێن واکاں آیی دست ءَ انت، اے پێشامدے باروا میاریگ انت ءُ هچ‌کسَ نه توانت اێشرا شه وتی بڈ ءَ دۆر دنت.

🔹اگاں مردماں سلاه داشتێں ماں اے پێشامد ءَ چنکه نپر شه شما کشگَ بوت؟

مولانا عبدالحمید اے پێشامدے لچێنگ ءَ‌ را به وت‌مستری‌لۆٹێں پاٹیاں رد کرت ءُ گوشت ئِے: آوان که اے جنایت ءَ‌ را کرتگ، نون په راستالے چێر دیگ ءَ به درۆگ ءَ لچتگ انت. اے پێشامدے لچێنگ به وت‌مستری‌لۆٹاں پکائێن درۆگے. یا گوشتگ اش که ما را گۆں سلاه ءَ جتگ اش. اگاں شما را گۆں سلاه ءَ جتگ اش گڑا چنکه نپر شه شما مرتگ؟ ائولی گشت ءَ که گێشترێن مردم کشگ بوتگ انت یک نپرے هم شه شما کشتگ نه بوتگ. پچے درۆگَ گوش ات؟ هرچی درۆگ گوش ات الله ءُ استمانے ناراضگی گێشترَ بیت.

زاهدان ءِ جمعه ءِ امام ءَ گوشت: گۆں کجام مۆکل ءَ جائے که الله عبادتَ بیت آسکاری کرتگ ات؟ پچے دو ادار مردمانَ تیر کرتگ ات؟ ادا یک مامورے هم کشگ نه بوت پچےکه مردماں سلاه نه داشتگ.

واجه ءَ گۆں اێشی درشان ءَ که اے دو ادارے کشتگاں شه اے سے هپتگے زهرشانیانی کشتگاں گێشتر بوتگ انت، گوشت ئِے: مئے امێتداری شه تهران ءِ ذمه‌واراں اێش انت که اے بن‌گپ ءَ رندگیری کن انت. استان ءِ مردم ءُ شهیدانی لۆگمانانی ٹوهترین لۆٹ هم همێش انت که پهکێن واکاں که مردمانَ کشتگ اش مجازات بےانت. آوان هم که پرمان داتگ دستگر بےانت.

🔹

مردمانی وۆٹ ءَ را کٹ ات اِت بلێن شه آوان دلجویی نه کرت ات

مولانا عبدالحمید شه آوان که شه ملکے تها ءُ ڈن ءَ گۆں زاهدان ءِ مردماں همدردی اش کرتگ، منتواری کرت ءُ شه آ ایرانیاں که بےبرمش بوتگ انت، گلگ ئِے کرت. واجه ءَ درائێنت: ما شه آ ایرانیاں سک گلگ دار اێں که مئے مردماں دێر انت که گۆں آوان همکاری کرتگ، بلێن آوان اے پێشامدے باروا هچ هبرے نه کرت. هاس آوان که نون ماں سرکار ءَ اگده ءِ نه دار انت بلێن چنکه سال ماں سرکار ءَ اگده اش داشتگ ءُ همے مردمانی وۆٹ ءَ‌ را کٹتگ اش. ما شه شیعه ئێں پاگواجهاں هم گلگ دار اێں که اے بارو ءَ هچ هبرش نه کرت.

🔹43 سال انت گۆں نابرابریانی آماچ اێں

مولانا عبدالحمید حکومت ءَ را شه الله ءِ آزموداں زانت ءُ گوشت ئِے: حکومت ءِ واهنداں که پێسر ءَ بندیگ بوتگ انت ءُ الله ءَ آوانَ آزات کرتگ ءُ حکومت داتگ زان انت که اے دادانَ الله دنت ءُ ما را گۆں اے داداں آزمودَ کنت. هچ حکومت ءِ واهندے گمان مه کنت که اے شه آیی بودشت ءَ انت، بلکه الله انت که عزت ءُ حکومتَ دنت تاں اے رنگ ما را آزمود کنت. اگاں عدالت ءُ آمید بیت، آزاورانی هزمت بیت ءُ حکومت ءِ واهنداں مردمانی نگدانَ منّ انت، گڑا الله وشنودَ بیت ءُ آوانی حکومت ءَ مانێن ایت.

واجه ءَ گوشت: حکومتاں بائد مردمانی توار ءَ بشکن انت. 43 سال انت که راج ءُ مذهباں گۆں نابرابریان آماچ انت. چنکه اے درگت ءَ شکایت بوتگ ءُ چنکه گۆں ٹوهێن ذمه‌وار ءُ گۆں مزن‌رهشۆن ءَ کاگد ءُ کرّاچ بوتگ.

🔹گهترین تۆجیل تدبیر انت

زاهدان ءِ جمعه ءِ امام ءَ نونێن زهرشانیانَ بازێن مشکلانی سبب زانت ءُ درشان ئِے کرت: اگاں پێسر ءَ اے مشکلاں رندگیری بوتێن انت، شاید جاور مرۆچی ئێں رنگ ءَ مه بوتێن. بائد مردماں مۆکل دیگ بےانت تاں هبر دےانت ءُ وتی مشکلانَ جار جن انت. نبائد اے چیز دشمنی زانگ بیت. مردمانی هبرانی اشکنگ گهترین تۆجیل انت. مردمانی لٹءُکٹ ءُ کشگ تۆجیل نه انت. ما پهکان ایرانی اێں ءُ بائد همدگر ءَ سگ اێں.