رمضان عبادت ءُ رۆچگ ءِ مۆسم ءُ قرآن ءِ اێر آیگ ءِ جشن انت

شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (۱۲ فروردین ۱۴۰۱/ 1 آوریل 2022) گۆں اشاره به رمضان ءِ ماه ءِ نزیکی ءَ اے ماه ءَ را «عبادت ءِ مۆسم» ءُ «قرآن ءِ اێر آیگ ءِ جشن» زانت ءُ په استفاده شه اے بےجۆڑه ئێں وار ءَ سکّ سۆگه ئِے کرت.

په سنی‌آنلاین ءِ سرهال ءَ شیخ‌الاسلام مولانا عبدالحمید گۆں اے آیتے وانگ ءَ «يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ» [بقره: ۱۸۳]) درشان ئِے کرت: رمضان ءِ ماه ءَ دێم ءَ دار اێں. رمضان عبادت ءُ رۆچگ ءِ مۆسم ءُ قرآن ءِ اێر آیگ ءِ جشن انت. اے الله ءِ سخاوت ءُ فضل انت که هرسال چشێں ماه ءِ را کار ایت، اپال کن اێں ءُ وت را په اے ماه ءَ تیار کن اێں. په ویل په سفر ءَ مه رو اێں ءُ ماں خێرێں کاراں چۆ درس قرآن ءُ تراویح ءِ ختم قرآناں بهر زور اێں. جهد کن اێں وتی وهد ءَ گۆں قرآن ءِ تلاوت ءَ گوازێن اێں ءُ جهد کن اێں هرچی گهتر ءُ گێشتر شه رمضان ءَ استفاده کن اێں.

واجه ءَ گێش کرت: ماں رمضان ءَ په کم هبر دیگ، کم ورگ ءُ کم وسپگ ءَ جهد کن ات. ماں اے ماه ءَ وێلێں ءُ بےپۆنێں هبرانَ ترک کن اێں. بازێں هبرے جاگه ءَ گۆں ذکر ءُ درود ءُ استغفار ءَ دزگٹ به اێں. سکوت ءُ ذکر ءَ ماں اے ماه ءَ تمرین کن اێں. واجه رسول الله صلّی‌الله‌علیه‌وسلم گێشتر ساکت ات ءُ په وتی امت ءِ رکّێنگ ءَ فکرے کرت.

دارالعلوم زاهدان ءِ سرمستر ءَ دێمتر ءَ درشان کرت: رمضان ءَ گۆں عبادت ءَ گوازێن اێں، هم ماں نماز تراویح ءَ بهر زور اێں ءُ هم نماز تهجد بوان اێں. رمضان ءِ رۆچانَ گۆں واب ءَ تباه مه کن ات، بلکه نیاز ءِ کساس ءَ آسودگ کن ات ءُ تلاوت ءُ خێرێں کار کن ات. گۆں وتی کار ءُ سۆدائاں گلائێش به ات ءُ شه الله ءَ بےترانگ مه به ات.

واجه ءَ دێمتر ءَ گوشت: په سار به ات که شمے رۆچگ نقصان مه گند ایت، وتی چم ءُ گۆش ءُ دپ ءَ شه گناه ءَ حفاظت کن ات. اگاں انسان گناه ءَ ویل مه کنت رۆچگ ءِ ثواب تباه بیت. اگاں په جوانی رۆچگ گر ات گڑا مئے وجودے تها اثر هل ایت.

زاهدان ءِ جمعه ءِ خطیب ءَ گوشت: رۆچگ ءِ ماه ءَ وتی زرّانی زکاتان َ دےات، بےوس و نادارانَ دلگۆش کن ات ءُ به دینی وانگجاهان هم کمک کن ات.

دارالعلوم زاهدان ءِ سرمستر ءَ همےپێم حافظ قرآنانَ هم سۆگه کرت که قرآن ءَ ماں نماز تراویح ءَ اێرنگ بوان انت که مردم سرپد بےانت، تعدیل ارکان هم بیت ءُ دو سجده ءِ میانجینا هم نند انت تاں نمازوانۆکاں توانت انت ذکر کن انت.

🔹حکومت ءِ سیاستانی جۆڑ کنگ ءِ وهد ءَ «الله ءِ وشنودی» ءُ «استمان ءِ سۆبان» دلگۆش بےانت

زاهدان ءِ جمعه ءِ امام ءَ ماں دگه بهرے شه وتی هبراں گۆں اشاره به 12 فروردین ءَ «جمهوری اسلامی ءِ رۆچ» اے رۆچ ءَ را مرادبات گوشت ءُ درشان ئِے کرت: امێتوار اێں ملک ءِ ذمه‌واراں سیاست ءُ ملکی رهبندانَ دوارگ چار انت. سیاستانَ اێرنگ جۆڑ کن انت که الله ءِ وشنودی ءُ استمان ءِ عزت ءُ ملکی سۆبان حاصل بے انت.

🔹«احتکار» شه شرع ءِ رد ءَ رَد انت

مولانا عبدالحمید ماں دگه بهرے شه وتی هبراں شه «احتکار» ءَ انتقاد کرت ءُ گوشت ئِے: ارمان که لهتے شه سۆداگراں ورگی کالا ءُ انچێں کالائانَ که مردم احتیاج دار انت، احتکار کن انت. دلگۆش کن انت که احتکار شه شرع ءِ رد ءَ رد انت ءُ ماں حدیثاں آوانی بارو ءَ ترندێں پاترپ آتگ.

واجه ءَ گوشت: اے که مردم رۆچگ ءِ ماه ءَ په ورگی ءِ گیر آرگ ءَ تکانسر بےانت جوانێں کارے نه‌اِنت. رۆزی الله ءِ دست ءَ انت ءُ ما وتی رۆزی ءَ په الله ءَ به هل اێں.

🔸شیخ‌الاسلام مولانا عبدالحمید وتی هبرانی گڈسر ءَ گۆں اشاره به ڈاکٹر حبیب‌الله مَلِک ءِ وفات ءَ یکے شه استان سیستان ءُ بلوچستان ءِ زبردستێں ڈاکٹراں، په آ خدابیامرزا شه الله بارگاها بکشش ؤ برزین درجه ؤ په پشپدان مزّ ؤ اوپار لوٹۆک بوت.