گهترێں درس ءُ اندِرس په اُلساں راجدپتر انت

شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (20 اسفند 1400/ 11 مارچ 2022) «راجدپتر» ءَ را گهترێں درس ءُ اندرس په نونێں ءُ آیۆکێں مردماں زانت ءُ مسلمانانی دێمروی ءَ را ماں اطاعت شه الله ءُ پهرێز شه گناهاں زانت ئِے ءُ سکّ سۆگه ئِے کرت که ماں شعبان ءُ رمضان ءِ ماهاں عبادت کن اێں ءُ وتی سستیانَ جبران کن اێں.

په سنی آنلاین ءِ سرهال ءَ شیخ‌الإسلام مولانا عبدالحمید گوشت: الله پاک ءَ دنیا ءَ را په انساناں اندرسے جۆڑ کرتگ. راجدپتر په نونێں ءُ آیۆکێں مردماں گهترێں درس انت. باید راجدپتر ءَ گهوانی کن اێں ءُ پێسرے مردمانی سۆبمندی ءُ بےسۆبیانَ دلگۆش کن اێں.

واجه ءَ گێش کرت: ماں راجدپتر ءَ استمانانی دێمروی ءُ پدمانی ءُ بێرانی پدّر انت. قرآن راجدپتری کتابے نه انت، بلێں ماں قرآن ءَ پێسرے استمانانی جاور بیان بوتگ انت. قرآن پێسرے مردمانی سۆبمندی ءُ بےسۆبیانَ بیانَ کنت تاں انسانان آوانی جاورانَ چار انت ءُ درس ءُ اندرس گر انت.

زاهدان ءِ جمعه ءِ امام ءَ به پیسرے استمانانی پروشانی سببان اشاره کرت ءُ گوشت ئِے: ارمان که نونێں زمانگ ءِ مردمان ءُ بازینے شه پێشے مردمان شه پێسرے استمانانی راجدپتر ءَ اندرسَ نه گر انت ءُ آیرا نادلگۆش کن انت. اگه دلگۆش هم کن انت په جهلانکی دلگۆش نه کن انت. بازینے شه زۆآروێں استماناں په گناه ءُ ظلم ءُ فساد ءُ پدگیری شه نفس ءِ لۆٹان تباه بوتگ انت. شرک ءُ کفر ءُ وت‌منّی ءُ غرور سبب بوت انت که الله ءِ داداں شه آوان گرگ بےانت ءُ الله ءَ آوانَ تباه کرت.

واجه ءَ گیش کرت: عاد ءُ ثمود ءُ لوط ءُ اصحاب مدین ءُ فرعون ءِ قوم شه هما دنیا ءِ زۆرآورێں و نام پرشتێں قومان بوتگ انت، بلێن وهدے که حق ءِ دیما اۆشتات انت ءُ گۆں فساد ءَ آماچ بوت انت ءُ الله ءِ فرمان ءَ نه زۆرت اش، الله ءَ آوان عذاب دات که په دنیا ءِ مردمان اندرس بوت انت.

🔷  مسلمانانی زۆراکی ءُ سربرزی مان پدگیری شه الله ءِ حکمان ءُ پهریز شه گناه ءَ انت

مولانا عبدالحمید دێمتر ءَ واجه رسول الله صلی‌االله‌علیه‌وسلم ءُ صحابه ئانی زمانگ ءَ را مسلمانانی عزت ءِ ٹل زانت ءَ گوشت ئِے: مسلمانان واجه رسول الله صلّی‌الله‌علیه‌وسلّم ءُ صحابه ئانی زمانگ ءَ به عزت ءِ ٹل ءَ رست انت. آ درگت ءَ مسلمانان به هبرزوی شه الله ءُ آیی رسول ءَ پهرءُ شأنَ کرت، نێکێن کارشَ کرت ءُ په دل الله ءَ عبادت اشَ کرت. واجه ءَ مسلمانانی عزت ءَ را ماں هبرزوری شه الله ءُ رسول صلّی‌الله‌علیه‌وسلّم ءَ ءُ فرمان به نێکی ءُ مکن شه بدی ءُ پهرێز شه گناه ءُ کاهل نمازی ءَ زانت ءُ مسلمانانی پرۆشانی سببان ماں ایمان ءِ سستی، پدگیری شه نفسے لۆٹان ءُ گناه ءُ ترۆندآپے ورگ، نشه ئی مواد ءُ زنا ءُ قتل ءُ وت‌منّی ءُ غرور ءَ زانت.

🔷  اگاں انساناں شه قرآن ءُ پیغمبرانی سۆگه ءُ رهشۆنیاں پدگیری کن انت به تاهیر ءُ اخلاقی دێمروی ءَ رس انت

زاهدان ءِ جمعه ءِ امام ءَ درشان کرت: اول وتی باور، اخلاق و کردار ءَ جۆڑ کن ات. اگاں انساناں شه قرآن ءُ پیغمبرانی سۆگه ءُ رهشۆنیاں پدگیری کن انت ءُ به جوانێں اخلاق، ایمان ءُ نێکێں کردار ءَ رس انت، المی انساناں به گواچنی ئێں دێمروی ءُ الله ءِ قرب ءَ رس انت ءُ دنیا ءُ آخرت ءِ تاهیر ءَ کٹ انت.

واجه ءَ گێش کرت: مرۆچی مردمانی زندگی ءِ تها تاهیر ءُ اشکام نێست ءُ مردماں تاهیر ءِ پدا انت. بلێں زان ات که تاهیر الله ءِ ذکر، نێکێں کردار ءُ نێکێں اخلاق ءِ تها انت.

دارالعلوم زاهدان ءِ سرمستر ءَ گوشت: من ءَ سۆگند انت به هما ذا تءَ که منی ءُ شمے جان آیی دست ءَ انت که شاید شما توان ات بازێں چیزے ءِ بدل ءَ ودی کن ات، بلێں «دین»، «ایمان»، «الله» ءُ «واجه رسول الله صلّی‌الله‌علیه‌وسلّم» ءِ بدل ءَ ودی کرتَ نه کن ات. دین باز هژدری ءُ اثردار انت، پرےواستا گۆں جَن ءُ زهگ ءُ پیر ءُ ورنا ءَ به دین ءَ لچ ات.

مولانا عبدالحمید وتی هبرانی گڈی سر ءَ گۆں اشاره به دۆره تفسیر ءِ ارزشت ءَ گوشت ئِے: مولانا عبدالغنی بدری حفظه‌الله ماں دارالعلوم زاهدان ءَ تفسیر قرآن ءِ دۆره ءَ برجم داشتگ. مولانا بدری پرے درس ءَ وخت هشتگ ءُ جهدَ کنت. ورنا ءُ گوهار ءُ براساں شه اے وار ءَ سۆب بر انت. ماں قرآن ءَ هدایت هست. هچ کتابے چۆ قرآن ءَ په انسان ءَ سوبمند نه انت، ما پهک قرآن ءَ بوان اێں ءُ دلگۆش کن اێں.