بلوچستان ءِ سرکار وتی کولاں چہ بجّ اِتگ – مکران ءِ مزن شاھدگ ءِ سر ءَ زھرشانی کنیں

دو شمبے ءِ روچ ءَ حق دو تحریک ءِ سرکماش مُولانا ھدایت الرحمان ءَ بلوچستان ءُ ایران سیمسری دو سد ءُ پنجاہ ءِ ترءُ تاب کُتگ.

ھمے وھد ءَ آئی ءَ بازیں جاھاں پوجی پانگس ءُ مردمانی کم شرپی ایرجتگ اَنت.

مولانا ھدایت الرحمان ءَ دمگی واکدار ءُ سرکار ءَ چہ ھمے گوشتگ کہ اگاں مھلوک ءِ پریشان کنگ بند کنگ نہ بوت گڑا ھمے زوتاں دوسد ءُ پنجاہ ءِ باڈر ءَ ھم زھرشانی کن این.

گوستگیں روچ ءَ مولانا ھدایت الرحمان بلوچ ءُ دگہ رھشوناں بلوچستان ءِ تیاب دپی دمگ گوادر ءَ پریس کانفرنس ءَ گوں اھوالکاراں تران کنان ءَ گوشتگ کہ بلوچستان ءِ سرکار وتی کولاں چہ بج اِتگ، بلوچ ءِ زِر ءَ گیرکانودی ٹرالنگ ءُ سیمسری کار ءُ بار ءِ سر ءَ بندش انگت برجاہ انت.

ھمے وھد ءَ آئی ءَ دوبر نندانک جنگ ءُ کوسٹل ہائی وے ءِ بند کنگ ءِ جار جتگ.

آئی ءِ گوشگ ات کہ گوستگیں سال ءِ گڈی ماہ ءَ سرکار ءِ گوم ءَ گند ءُ نند ءِ بوتگ ءُ پد ءَ زھرشانی ھلاس کنگ بوتگ.

وزیراعلی ءَ نندانک ءِ سر ءَ اتکگ ءُ لوٹانی منّگ ءِ باور کنائینتگ بلے تنی وھدی ھچ کنگ نہ بوتگ.

ھمے وھد ءَ آئی ءَ دیمتری کارانی ھاتر ءَ جار جتگ گوشتگ کہ بیست جنوری ءَ اورماڑہ، سَے فروری ءَ پسنی، دہ فروری ءَ سربندن ءُ بیست ءُ ھپت فروری ءَ اوتھل ءُ یک مارچ ءَ گوادر ءَ پد ءَ نہ کٹوکیں نندانک جنگ بیت ءُ زھرشانی کنگ بیت اِنت.

آئی ءَ وتی لوٹ یکرندے پد ءَ دیم ءَ آؤرتگ انت کہ تنی وھدی اد ءَ گیرکانودی ٹرالنگ، سیکورٹی پوج ءِ پانگساں مھلوک ءِ کم شرپی ءُ سیمسر ءَ مھلوک ءِ کار ءُ بار سر ءَ بندش انت.

آئی ءِ گوشگ ات کہ سرکار ءِ کولانی سر ءَ اوست کنگ نہ بیت ھر چیز ءَ ما وت تر ءُ تاب کنگ ءُ چارگ ءَ انت مھلوک ءَ یکرندے پد ےَ دگانی سر ءَ کاریں.

سرچمگ: دی بلوچستان پست